CEBU, Philippines - Ang mga topseeds nga sila si FIDE Master Anthony Makinano ug National Masters Rogelio Enriquez ug Arnold Cadiz misalida og maayo, samtang lain pang 22 ka entrante ang wa’y tatsa human sa duha ka hugna nga aksiyon sa Cebu Executives and Professionals Chess Association (CEPCA) Silver Anniversary Open Tournament kagahapon diha sa second level duol sa Slimmers World sa SM City-Cebu.
Apil sab sa mipakita og maayong labok mao ang duha ka Cepcans nga sila si Jojo Moralla ug Jimmy Ty Jr. nga milansang sab og 2.0 puntos nga gikahimuot og maayo ni CEPCA President Engr. Jerry Maratas ug sa uban pa nilang kaubanan nga maoy nag-organisar sa maong duha ka adlaw nga torneyo nga migahin og kapin sa P50,000 nga ganti ngadto sa mga mananaog. Si Moralla, kanhi pangu sa maong kahugpongan mipukan nilang Alphecca Gonzales ug Roger Ranile, samtang si Ty, ang labing unang back-to-back champion sa CEPCA “Battle of Champions”, mipatigbabaw batok nilang Justin Luis Joseph ug Ramon Toledo.Apan ang atensiyon nasentro ngadto nilang Makinano, Enriquez ug
Cadiz, nga mipataas og maayo sa bandila sa ilang kampanya sa kampiyonato. Si Makinano, kanhi Palaro gold medalist, mipakaging nilang Gilberto Baylosis ug Edel Vosotros.
Susama sab ang nakab-ot ni Enriquez, nga mimakmak nilang Mykha Borgonia ug Rafael Perez ug ingon man si Cadiz, kinsa mibuntog nilang Jesse de los Santos ug John Cadiz.
Nakigduyog uban kanila sa sunod nga hugna mao ang lain pang mga lig-on nga mga kontender sama nilang Ronald Ganzon, Rommel Ganzon, Richard Natividad, Edcel Montoya, Felix Shaun Balbona, Mario Mangubat, Carlos Moreno III, Byrle Arellano, Venancio Loyola, Jr. ug Bonn Rainauld Tibod.
Milayat sab sa Round 3 nga wa’y pilde mao sila si Romelio Asoque,Joseph Caballes, Romulo Pialan, Jeremy Pepito, Marc Bryan Villarojo, Ramil Wadim, Edwel Alesna, Duane Borgonia, Adrian Basilgo ug Charita Jacobs. (BANAT NEWS)