Magkaguliyang na sab ang mga Sugboanong mga basketball fans atol sa pagduaw dinhe sa dakbayan sa Sugbo sa duha ka PBA teams ang San Miguel Beermen ug ang Barangay Ginebra San Miguel Gin Kings unya sa umaabot Oktubre 9 ug 10 diin moduwa sila'g duha ka adlaw diha sa Cebu Coliseum.
Matod pa sa promoter sa maong duwa nga si Lorenzo "Chao" Sy, misugot na ang mga team managers sa duha ka teams nga moduwa sila dinhe sa Sugbo.
Sa dili pa magbagat silang PBA back-to-back MVP June Mar Fajardo sa San Miguel Beermen ug Gregg Slaughter sa Ginebra San Miguel sa Oktubre 10, makigsangka una ang San Miguel ug Ginebra batok sa duha ka local teams nga mao ang Samsam Gullas team ug ang SG team sa Lapu-Lapu City.
Mitug-an si Sy sa SPORTSgab kagahapon nga hayag nang madayon ang iyang promotion kay human sila magpadala og pormal nga imbitasyon ngadto sa duha ka teams, misanong na kini ug mipakita'g kaikag nga moduwa dinhe sa Sugbo.
Mitabang og hangyo sa San Miguel team si Atty. Baldomero C. Estenzo ug misugot na si Robert Non, ang team manager sa Beermen.
Isip mga ungo sa basketball, bisan og usa lang kini ka exhibition game, tataw nga dugokon kini sa mga fans tungod kay dili pirmeng dunay duwa sa PBA sa Sugbo ug ato pa gyud makita ug ma-lamano sa linawas ang mga idols nato sa PBA.
CESAFI semis na. Ugma na magsugod ang semifinal round sa juniors division tungod kay nakumpleto na ang upat ka teams nga miabante nga mao ang no. 1 Sacred Heart School-Ateneo de Cebu Magis Eagles, no. 2 University of San Carlos Baby Warriors, no. 3 University of Cebu Junior Webmasters ug ang no. 5 University of the Visayas Baby Lancers, ang labing uwahing miabante human sa ilang 77-58 nga kadaogan batok sa University of San Jose Recoletos Baby Jaguars kagahapon didto sa Cebu Coliseum.
Giusikan sa Baby Jaguars ang ilang twice-to-beat advantage ug daw sa nakalitan sila dihang mibawos ang Baby Lancers sa unang duwa sa quarterfinals nga maoy nakabungog kanila pinaagi sa 68-42 nga kadaogan niadtong Septiyembre 10.
Midaog unta ang Baby Jaguars sa elimination 65-43 niadtong Agosto 8 apan daw sa walay gihimong adjustment ang Baby Jaguars kinsa kinahanglan lang unta'g usa ka daog aron moabante ug mohimo'g kasaysayan isip maoy unang team nga mipalagpot sa UV sa elimination. Makaingon kita nga taghap lang diay katong ilang unang daog apan ato sab makita sa line-up nga mas dagko ug mas tag-as ang Baby Lancers nga gipangulohan ni Raul "Jancork" Cabahug kinsa maoy ilang leading scorer kung itandi nilang Arnold Dave Ando nga maglisod gani'g score sa ilawom ug kang Geo Ibero nga maglisod og lay-up.
Bisan gani si Joshua Renz Ortiz dili makasugakod one-on-one kang Cabahug kinsa dili lang kay maayo sa ilawom, aduna pa'y maayong pulos sa perimeter shots ug lisod pildehon sa rebound.
Mag-round robin ang upat ka semifinalists ug ang teams nga maoy makakuha sa labing daghang daog maoy magbagat sa finals samtang ang laing duha ka teams nga menos og daog maoy magbagat alang sa ikatulong pwesto.
Sa kasamtangan, amo nang nakita sa mga sportswriters nga nagkober sa mga duwa sa CESAFI nga lisod kaayong pildehon ang Magis Eagles apan tungod kay lingin man ang bola ug duwaon pa man kini, wala'y imposible sa natad sa basketball. Bisan og duol na sa tinuod nga mahimong kampiyon ang Magis Eagles, dili nato matag-an ang dagan sa duwa.
Busa, good luck nalang sa mga teams ug sa mga coaches nga silang Rommel Rasmo sa Magis Eagles, Britt Reroma sa Baby Warriors, Joever "Brad" Samonte sa Junior Webmasters ug Abel Bungcaras sa Baby Lancers.