CEBU, Philippines - Parehong mikulit og daog ang top 2 teams sa Division A -- Petron Goldberry ug RDAK Stallions sa 20th SHAABAA Cup basketball tournament niadtong Miyerkules didto sa SHS-AdC old campus gym sa General Maxilom avenue, ning dakbayan.
Ang Petron Goldberry (9-1) midaog batok sa Chick@Phil Basic sa iskor nga 79-52 aron pabilin nga mag-una sa Division A, samtang ang RDAK Stallions milubong sa Filmon Prince Medallion, 56-22 alang sa ilang 8-2 nga baraha.
Si Ed Macasling maoy nangu sa Goldberry sa iyang 18 puntos, silang Job Shan ug Justin Huang midugang og 12 ug 11 puntos matag usa.
Ang Chick@Phil Basic, kinsa adunay 1-9 nga baraha, gipangulohan nilang Jappeth Quiñanola sa iyang nuybe.
Sa laing bahin, ang Stallions gipangulohan ni Bernard Jett Lopez, kinsa miposa’g 10 puntos, samtang si Jonathan Cimafranca nga adunay 16 puntos mao ang nangu sa Filmon Prince Medallions.
Sa sangka sa Division B, ang Dynamic Power midaog batok sa Filmon Furnishing Studio, 48-38.
Ang Dynamic Power, kinsa adunay 8-2 nga baraha gipangulohan ni Mark Guanzon sa iyang 23 puntos, samtang ang managsuong Aldie ug Lester Canizares miburak og 10 puntos matag usa aron maoy mangu sa Filmon.