CEBU, Philippines – Ang tanang upat ka boksidor nga nagdala sa ngan sa Thai stable owner nga si Naris Singwangcha midaog batok sa tagsa-tagsa nilang karibal sa “Binukbukay sa Punta Princesa” boxing card niadtong Sabado sa gabii didto sa Atillo gym sa Brgy. Punta Princesa, Cebu City.
Si Canoy J. Singwangcha midaog pinaagi sa usa ka eight-round knockout batok ni Rodel Tejares sa Malaybalay, Bukidnon aron madepensaan ang iyang korona sa Asia Boxing Federation ubos sa mini-flyweight division.
Human sa pipila ka minutos nga sinukliay, si Canoy mipatama og solidong kumo ngadto sa tiyan ni Tejares hinungdan sa pagkalup-og niini sa 1:38 sa eight round.
Laing boksidor gikan sa Naris Singwangcha ang mihimo sab og impresibong kadaugan dihang si Boyoshi A. Singwangcha mipatikangkang ni Phil Angcamor sa Valencia, Bukidnon sud sa 40 segundos sa second round.
Mikulit sab og sayong kadaugan si Joaquino E. Singwangcha dihang iyang gi-knockout si Marlon Talili sa may 1:45 ang oras sa first round.
Laing midaog mao si Dignos M. Singwangcha pinaagi sa unanimous decision batok ni Ponciano Remandiman sa Cebu City.
Si Junriel Jimenez sa sitio Viking, Alaska, Mambaling midaog pinaagi sa ‘unanimous decision’ batok ni Roga Libres sa Cebu City. (BANAT NEWS)