CEBU, Philippines – Ang Convergys Converters mi-rally sa ikatulong kuwarter aron pagpakgang sa SSI Warriors, 49-43 sa 11th CSCC E-League men’s basketball tournament niadtong Sabado didto sa City Sports Club-Cebu gym.
Si Lourenz Limpangog miratsada og 16 puntos, samtang si Sherwin Resilla midugang og 12 puntos alang sa Converters nga pabiling nagsolo sa liderato sa Elite Classic bitbit ang 3-0 win-loss record.
Ang Converters alkansi og uno punto sa halftime, 18-19, apan milusad kini og 20-9 run aron pag-usab sa dagan sa duwa pabor kanila.
Si Lawrence Daven Agas mitali og12 puntos apan nakawang ang iyang paningkamot gumikan kay nakatilaw man ang SSI sa ikaduha niiing pilde sa tulo ka duwa.
Sa laing aksiyon sa Elite Classic, ang Teleperformance All-Stars miangkon sa una nilang daog human gipakaging ang Wipro Tigers, 72-61.
Sila si Ryan Veloso ug Marcos Genteli Jungoy III mipugnit og 11 puntos matag usa alang sa Teleperformance, samtang si Franz Martinez maoy nangu sa Wipro bitbit ang 16 puntos.
Sa Evo League, si Junrey Cabarrubias mipatuasik og 16 puntos aron pagpangu sa 63-42 nga demolisyon sa Kyocera Frontiers batok sa 1&1 Marauders, 63-42, samtang si Ralph Belarmino mipabuto og 26 puntos alang sa 24/7 Cagers nga miabli sa ilang kampanya pinaagi sa paglansang og 61-51 nga kadaugan batok sa Calltek Trojans. (BANAT NEWS)