CEBU, Philippines – Nakahimo gihapon sa pagdaog ang Oklahoma City Thunder bisan og wala ang ilang duha ka superstars nga silang Kevin Durant ug Russell Westbrook pinaagi sa pagpilde sa Los Angeles Lakers, 108-101 kagahapon didto sa Staples Center sa Los Angeles, California.
Sila si Serge Ibaka ug D.J. Augustin maoy nangu sa Thunder sa ilang 18 puntos matag usa. Apan si Ibaka milangkat og 14 ka rebounds, samtang si Augustin adunay siyam ka rebounds. Si Enes Kanter miabuno’g 16 puntos uban ang 15 ka rebounds.
Wala na makaduwa si Durant tungod sa iyang napiang nga tiil, samtang si Westbrook gioperahan sa iyang aping didto sab sa iyang yutang natawhan sa Los Angeles.
Si Jeremy Lin maoy nangu sa Lakers pinaagi sa iyang 20 puntos, walo ka assists ug unom ka rebounds. Walo ka players ang mihakot og otso puntos matag usa, apan wala masumpo ang ilang ikaupat nga sagunson nga kapildihan.
Niduwa sab ang Lakers nga wala ang ilang topscorer nga si Nick Young. Si Jordan Hill miabuno’g 14 puntos ug 12 ka rebounds alang sa Lakers.
Ang Thunder nagsugod og 4-10 record karon nga season dihang parehong wala makasugod og duwa silang Durant ug Westbrook. Apan hinay-hinay silang mikamang aron mabuhi ang ilang kampanya sa playoffs. Sila maoy naghupot sa ikawalong puwesto.
Si Jeremy Lamb miamot og 14 puntos alang sa Thunder ug ang iyang three-pointer maoy naghatag kanila’g 14 puntos nga labaw aron sab malikayan nila nga mahimong winless sa ilang tulo ka road games.
Si Westbrook nakahimo na’g tulo ka sagunsong triple-doubles, apan kinahanglan siyang operahan tungod sa nabuak niyang aping human maigo sa tuhod sa iyang teammate nga si Andre Robertson niadtong Biyernes.
Wala na sab makaduwa si Durant og unom ka higayon kay gioperahan sab ang iyang tuong tiil nga dunay nagupok nga bukog. (BANAT NEWS)