CEBU, Philippines - Magbangga na sab ang Rain or Shine Elasto Painters ug Alaska Aces alang sa krusyal nga Game-5 sa ilang “best-of-seven” semifinals series sa PBA Philippine Cup didto sa Mall of Asia Arena.
Nagtabla sa kasamtangan ang duwa sa series, 2-2 ug ang kadaugan karon adunay dakung purohan nga moabante sa finals.
Ang duwa sugdan sa alas-5 sa hapon.
Ang Painters mao karon ang nagbitbit sa momentum human sila mapatabla ang serye dihang midaog sila sa iskor nga 98-91 sa usa ka pisikal nga duwa niadtong adlaw sa Pasko.
Si Rain or Shine head coach Yeng Guiao dili na buot og aduna pay laing sikit nga sangka batok sa Alaska.
Atol sa Game-4, nakapabor ang Painters human tawagi og “flagrant foul” si Aces forward Calvin Abueva sa hinapos nga minutos ngadto sa ilang point guard nga si Jonathan Uyloan nga maoy nahimong yawi sa ilang kadaugan.
Gusto ni Guiao ang solidong performance gikan sa iyang mga sinaligan nga sila si Beau Belga, Jeff Chan, Paul Lee ug Gabe Norwood aron molampos sila pagkulit og laing daog. (BANAT NEWS)