CEBU, Philippines - Mipabuhagay na sab og 30 puntos ang star player sa Huskies nga si Richard Madrid aron pangulohan ang koponan pagkulit og 117-94 nga kadaugan batok sa MS Motosuit sa Los Amigos Basketball Association (LABA) Commissioner’s Cup 2014 sa miaging gabii diha sa Banilad Sports Center, Mandaue City.
Si Madrid nakakuha sab og suporta gikan nilang Eugene Povadora, kinsa mitusak og 21 puntos, sila si Richard Bathan, Eboy Quiñahan ug Jerry Bejasa miiskor sab og double figures alang sa nagmangtas nga Huskies, kinsa miposte og 30 puntos, 80-50 sa third period.
Miarangkada ang MS Motosuit sa tunga-tungang bahin sa fourth quarter human ang team owner ug playing coach nga si Lou Ornopia miposa’g “back-to-back” three-pointers, apan pakyas sila pagkawat sa daog kay ang Huskies ni team owner Dr. Raul Monteroyo mosukli man sab og mga puntos.
Ang maong kadaugan nakapahayag sa paglaum ni Dr. Monteroyo ug sa Huskies nga moabante sa semifinals.
Ang MS Motosuit gipangulohan ni Loloy Son, kinsa miratsada’g 21 puntos, gisundan ni LABA vice president for internal Lou Ornopia pinaagi sa iyang 17 puntos, lakip na niini ang lima ka three point shots. Sila si Jerry Jacalan ug Albert Ramos nagkumboya’g 24 puntos alang sa MS Motosuit nga mitapos sa elimination round bitbit ang 4-3 nga baraha ning maong liga nga gipasiugdahan sa LABA ubos sa ilang presidente nga si Cris Ubas. Kining tinuig nga liga gipaluyohan sab ni Banilad Brgy. Capt. Greg B. Yap ug sa iyang mga konsehales. Ang mga duwa gidumala ni LABA vice president for external ug Banilad barangay councilor Gilbert Sebandal.
PUNTOS MATAG USA
HUSKIES (117) – Madrid 30, Povadora 21, Bathan 14, Quiñahan 12, Bejasa 10, Cuizon 9, Monteroyo 7, Angga 6, Rusiana 4, Alburo 2, Herbieto 2.
MS MOTOSUIT (94) – Son 21, Ornopia 17, Jer. Jacalan 14, Ramos 10, Jo. Jacalan 7, Ygonia 5, Perolino 5, Seno 5, Celiz 4, Limosnero 4, Labador 2.