CEBU, Philippines - Mibahog og 20 puntos si Orlan Wamar, 11 niini didto sa fourth period aron pangulohan ang mainitong rally sa University of the Visayas (UV) Baby Lancers nga maoy hait nilang hinagiban pagpukan sa University of Cebu (UC) Junior Webmasters, 91-80 sa 14th Cebu Schools Athletic Foundation, Inc. (CESAFI) kagabii didto sa Cebu Coliseum.
Mga duwa karon
(Cebu Coliseum)
5:15 pm
USPF vs. USJ-R (Jrs.)
6:45 pm
UV vs. USJ-R (Srs.)
Ang Baby Lancers nagbitbit karon og 6-1 nga baraha ug ang bugtong pilde ilang nahiaguman sa mga kuko sa Sacred Heart School-Ateneo de Cebu (SHS-AdC) Magis Eagles, 74-71 niadtong Agosto 19. Samtang ang Junior Webmasters naghupot og 4-3 nga baraha.
Nagtabla ang duha sa halftime, 43-all ug sikit kanunay ang duwa sa kinatibuk-ang third period diin igo lang milabaw ang UV og kuwatro puntos, 64-60. Apan nanginit silang Wamar, Theo Joshua Flores ug Raul Jancork Cabahug sa final period.
Si Flores, kinsa mihimo’g siyete puntos sa fourth period miamot og 18 puntos, samtang silang Cabahug ug Dominic Jan Morre adunay 11 puntos matag usa ug si John Carl Escalona miamot og 10 puntos. Ang leading scorer sa UC nga si Darrel Shane Menina miburak og 30 puntos nga maoy sagunson niyang 30-point game human sa iyang 39 puntos atol sa ilang kadaugan batok sa Dragons. (BANAT NEWS)