CEBU, Philippines - Sa unang higayon sa kasaysayan, duha ka Sugbuanong basketbolista nga silang Junemar Fajardo ug Greg Slaughter, miharos sa labing daku nga dungog atol sa PBA Leo Awards kagahapon didto sa Smart Araneta Coliseum.
Ang interesante kay ang duha pulos produkto sa Cebu Schools Athletic Foundation Inc. (CESAFI) nga migiya sa ilang tagsa-tagsa ka koponan sa dihang niduwa pa sila sa maong liga.
Si Fajardo maoy nangu
sa University of Cebu (UC) Webmasters pagsakmit og "back-to-back" CESAFI titles, samtang si Slaughter usa ka "grandslam" title-holder dihang niduwa pa siya sa University of the Visayas (UV) Green Lancers.
Ang 6-foot-9 center sa San Miguel nga si Fajardo nakakuha og 2614 points aron mokulit og kasaysayan isip sophomore player nga midaog sa labing dakung individual award sa liga.
Gipilde ni Fajardo sa maong award ang mga mas taas og kasinatian sa PBA nga silang Asi Taulava, Jayson Castro ug Ranidel De Ocampo.
Gawas sa MVP, si Fajardo mao usab ang nakadawat sa "Most Improved Player" award ug nalakip sab siya sa Mythical Five 1st team uban nila ni Mark Barroca, Taulava, Castro ug De Ocampo.
Ang lumad nga taga-Pinamungajan apil usab sa All-Defensive team uban nilang Marc Pingris, Gabe Norwood, Jireh Ibanes ug Barroca.
Sa iyang bahin, ang 7-footer nga si Slaughter mao sab ang giila isip "Rookie of the Year" bisan pa sa presensiya sa ubang mga lig-ong rookie.
Si Slaughter nga maoy usa sa haligi sa Barangay Ginebra San Miguel mipilde nilang San Mig Coffee Mixers forward Ian Sangalang ug Raymund Almazan sa Rain or Shine Elasto Painters.
Apil usab si Slaughter sa PBA Mythical Five 2nd team uban nila ni Pingris, Norwood, Sonny Thoss ug Paul Lee.
Si Willie Miller sa Barako Bull Energy Cola mao usab ang midawat sa "Sportsmanship of the Year" award. (BANAT NEWS)