CEBU, Philippines - Ang Sugbo Bikers sa pakigtambayayong sa Cebu City Government mopahigayon sa labing unang Sugbo Seawall Side Bicycle Oval Race sa Mayo 31 hangtod sa Hunyo 1 diha sa South Road Properties (SRP) grounds.
Si Cebu City Councilor Gerry Carillo, kinsa usa sab ka bike enthusiast, pormal nga milusad sa maong kalihukan kagahapon didto sa Porto's Diner and Grille uban sa mga kadagkuan sa Sugbo Bikers nga gipangulohan nilang Alberto Rabasol ug Fernando Sabal.
Naglaum si Carillo nga moabot sa 1,000 ka bikers ang mosalmot sa duha ka adlaw nga kompetisyon nga naglangkob sa mountainbike nga ipahigayon sa unang adlaw ug road race nga molibot og 15 ka laps diin adunay 2.8 kilometros ang matag lap sa finale.
Ang mga kategoriya nga tigian mao ang juniors (18 to 39 years old), seniors (40-above) ug ang premier open class.
Hinuon, ang organizers naglaraw nga modugang og special classes alang sa 'golden boys' (60-above) ug male riders.
Ang kampiyon sa matag kategoriya makadawat og P5,000, samtang ang ikaduha hangtod sa ikalima mobulsa'g P3,000, P2,000, 1,000 ug P500.
Gawas sa certificates of participation, ug libreng paniudto sa unang 100 ka registrants, ang tanang mga partisipante adunay kahigayonan nga modaog og mga premyo atol sa raffle draw inig human sa lumba.
Ang registration fee nagkantidad og P260 ug aduna kini usa ka raffle coupon. Alang niadtong interesadong mosalmot, mahimong mokontak ni Jo sa 254-3521 o di ba ni Alberto sa 0932-9129422. (BANAT NEWS)