CEBU, Philippines - Mihimo'g rekord sa Rising Stars Challenge si Andre Drummond human molangkat og 25 ka rebounds ug mihagdaw og 30 puntos aron pangulohan ang Team Hill (Dark) ngadto sa 142-136 nga kadaugan batok sa Team Webber (Light) atol sa BBVA Compass Rising Stars Challenge pasiuna lamang sa mga kalihukan sa All-Star Weekend kagahapon didto sa New Orleans Arena sa New Orleans, Louisiana.
Gawas sa iyang impresibong dunks ug rebounds, si Drummond nangigo sab gikan sa free throw line nga nakatabang kaniya aron dag-on ang MVP trophy.
Si Dion Waiters maoy nangu sa Team Hill sa iyang 31 puntos diin ang kadaghanan niini iyang gihimo pinaagi sa 1-on-1 duel batok ni Tim Hardaway Jr. sa New York. Si Bradley Beal mihipos og 21 puntos alang sa Team Hill ni kanhi NBA star Grant Hill.
Si Hardaway Jr. miposa'g 36 puntos, apil na niini ang pito ka 3-pointers alang sa Team Webber ni kanhi Michigan star Chris Webber. Ang rookie sa Philadelphia nga si Michael Carter-Williams miabuno'g 17 puntos, siyam ka assists ug unom ka rebounds.
Ang NBA Rookie of the Year sa miaging tuig nga si Damian Lillard sa Portland miamot og 13 puntos, lima ka rebounds ug lima sab ka assists.
Ang All-Stars sama nilang Kevin Durant, Dwight Howard ug Kyrie Irving misaksi sa duwa.
Si Waiters mihimo'g duha ka baskets ug dayon miposa'g duha ka 3-pointers, usa niini pinaagi sa step-back batok ni Hardaway. Gitubag sab kini ni Hardaway pinaagi sa pagpasud sa iyang kaugalingon 3-pointers.
Milansang si Waiters sa iyang ikaduhang sunod-sunod nga 3-pointers aron hatagan ang Team Hill og 126-124 nga labaw sa nahabiling 2:44 sa duwa. Nasundan kini sa dunk ni Drummond alang sa kuwatro puntos nga bentaha ug ang Team Webber wala na makarekober. (BANAT NEWS)