CEBU, Philippines - Mikabkab og 26 ka gold, 17 ka silver ug lima ka bronze medals ang Team Cebu City (TCC) aron dominahon ang swimming competition sa Batang Pinoy 2013 Visayas qualifying didto sa Tacloban City.
Gumikan niini, ang Sugbuanong swimmers nakakuha og katungod aron morepresentar sa rehiyon alang sa National Finals sa national development sports tournament nga gitakda sa Nobiyembre 19-23 didto sa Bacolod City.
Ang Bohol Province mipahiluna sa ikaduha nga mihipos og 21-12-8 gold-silver-bronze medals, samtang ang Leyte Province mitapos sa ikatulo nga adunay pito ka golds, pito ka silvers ug unom ka bronzes.
Lakip sa mga atleta nga misulbong og maayo alang sa TCC mao sila si Justine Reign Garrido nga adunay upat ka golds ug usa ka silver, Micah Marie de la Cerna sa iyang duha ka golds ug usa ka silver, Madelyn Capacio nga adunay upat ka golds ug usa ka silver, Karen Mae Indaya uban ang lima ka golds, Michael Ichiro Kong sa iyang upat ka golds, Val Andre Tiu nga adunay duha ka golds, Shane Allyne Parejo nga mihakot og duha ka silvers ug tulo sab ka bronzes ug si Tara Kyla Ebon sa iyang usa ka gold ug usa sab ka silver.
Ang ubang bulawan nga nakabkab sa TCC ni coach Rolando Alvarez naggikan sa relay events.
Gawas sa swimming, ang TCC nakakuha sab og mga luna sa national finals sa athletics, taekwondo, chess, weightlifting ug karatedo.