CEBU, Philippines - Gidominar sa Belgian pro triathlete nga si Anthony Devos ang 3rd Mayor Moonyeen Durano Streegan Cup niadtong Domingo didto sa Alegre Beach Resort sa Sogod sa amihanang bahin sa Sugbu, samtang ang Sugbuanang si Rochelle Tan nanghawod na sab sa kababayen-an sa standard division.
Sa laing bahin, ang sakop sa national youth team nga si Justin Chiongbian ug ang bag-ong atleta nga si Lorraine Han maoy nidominar sa mini-spring race.
"This is my first local race. I learned about this through the internet and I decided to join because this race fits my training schedule," matud pa ni Devos, kinsa nangandam alang sa Cobra Energy Drink Ironman 70.3 Philippines nga
gikatakda sa Agosto 4 didto sa Shangrila's Mactan Resort and Spa sa Lapu-Lapu City.
Gipakita sa 22-anyos nga si Devos ang iyang kapaspas sa langoy, biseklita ug dagan. Nag-una siya sa kinatibuk-ang lumba ug gitapos niya ang standard distance uban ang best time nga duha ka oras, 17 minutos ug 30 segundos.
Si Joseph Miller mi-okupar sa ikaduha sa oras nga 2:27.12, samtang ang runner nga milayat sa triathlete nga si
Alvirg Busa napunta sa ikatulo sa overall sa men's division sa oras nga 2:44.24.
Sa women's category, si Rochelle Tan milangkat sa iyang ikaduhang korona sa Moonyeen Cup human niya gitapos ang lumba sud sa tulo ka oras ug 16 segundos nga igo na kaayo alang kaniya aron mopahiluna sa unang dapit batok sa karibal niyang si Clanyl Gonzales, kinsa mi-oras og 3:01.23.
Ang amahan ni Rochelle nga si Tyrone miangkon sa ikaduha sa 40-44 age group nga gidominar ni Eugene Sanchez, samtang ang iyang boyfriend nga si Oliver Townshed nanghawod sa 16-24 division.
Si Tabuelan Mayor Rex Gerona mitapos sa ikatulo sa 44-44 category.
Ang lain pang mga mananaog sa ubang kategoriya mao sila si Jay Bryan Lawas (25-29), Christian Uy (35-
39), Jan Dennis Sinda (30-34), Dixon Tiu (45-49), Roelf Harerkamp (men’s 50-above) ug June Ocana, kinsa walay kontra sa female 30-39 division. (BANAT PALARO)