CEBU, Philippines - Gidominar nilang Prince Joey Lee ug Siena Mae Delechos ang tagsa-tagsa nila ka dibisyon sa 6th Mayor's Cup Run didto sa Mandaue City Cultural and Sports Complex.
Si Lee maoy labing kusog nga mihaguros sa men's division sa 15K open human niya gitapos ang lumba sa oras nga 49:48, samtang si Riez Enriquez mipahiluna sa ikaduha sa oras nga 50:10 ug si Michael Largo nalandig sa ikatulo nga mioras og 51:25.
Sa pikas bahin, si Delechos maoy miangkon sa 15K women's open title dihang iyang gihuman ang lumba sud sa usa ka oras ug kuwatro minutos. Sila si Mary Jane Beboso (1:07.17) ug Karla Cosep (1:13.15) miokupar sa ikaduha ug ikatulo nga dapit.
Sa 7K open, sila si John Daryl Manos ug Lovely Fe Andrin mao sab ang nanghawod sa tagsa-tagsa nilang kategoriya.
Si Mano naghari sa 7K men's class uban sa oras nga 19:38, nagsunod si Jobert Carolino sa oras nga 19:49 ug Joel Delposo sa iyang 20:56 nga oras.
Mokompleto sa top three finishers sa women's 7K mao sila si Hessica Jagna ug Jhoan Andrin (24:41.).
Sa 7K interbarangay men's division, ang top three finishers naglakip nilang Dandy Maturan (19:24), Raymart Montecalvo (20:36) ug Raymondito Batancila (20:45).
Sila si Lynle Cardinas (24:41), Crizel Diongson (25:03) ug Clarisse Diongson (26:10) mao sab ang top three finishers sa women's 7K interbarangay category.
Naglangkob sa top three finishers sa 3K kids male division mao sila si Danmeon Mier Po (34:12), Jared Delicano (34:16) ug Lexus Mancera (34:18), samtang sila si Cherry Andrin (34:13), Irish Delechos (24:16) ug Sarale Cuizon (34:25) sa female division. (BANAT PALARO)