CEBU, Philippines - Opisyal na nga sugdan ang unang hut-ong sa summer clinic sa Yaw-Yan ArDigma Martial Arts Federation karong adlawa diha sa 4th floor sa Coast Pacific Downtown Center sa dalan Sanciangko.
Gikan sa pulong nga "Sayaw ng Kamatayan" (Dance of Death), ang Yaw-Yan nailhan isip usa sa mga orihinal nga Filipino martial arts nga gimugna ni Grand Master Napoleon 'Nap' A. Fernandez. Ang maong matang sa martial arts unang gitudlo niadtong 1972 didto sa Sta. Cruz, Manila.
Ang Yaw-Yan ArDigma usa ka all out martial arts nga mogamit sa lawas isip hinagiban ug motudlo sa mga tinun-an og saktong paggamit sa sukmag, patid, siko, tuhod ug ground fighting isip self defense.
"Gawas nga makat-on sila og self defense gamit ang Yaw-Yan, ang mga musalmot sa summer clinic ilabi na kadtong mga batan-on mahatagan usab og lingaw karong panahon sa bakasyon nga mupalayo kanila sa mga illegal nga bisyu," matud pa ni Master Benigno 'Ekin' R. Caniga Jr., CEO ug founder sa Yaw-Yan ArDigma Cebu.
Lakip usab sa mga kurso nga pilian mao ang arnis, boxing, fitness, Yaw-Yan ArDigma System ug Mixed Martial Arts (MMA).
Dugang pa ni Caniga nga padayun gihapon sila nga nanawat og mga estudyante nga mokat-on sa maong martial arts. Alang sa dugang mga kasayoran, mahimong mobisita sa Yaw-Yan Gym o motawag sa numero 09065120888, 09198215582 o 09324524999. (BANAT NEWS)