Ang piniyalan paninglon

Kun kita piniyalan, nagpasabot kini nga kita gisaligan. Ug kay gisaligan man angayan lamang kita nga maglipay, dili tungod kay gisaligan kita kondili tungod kay kahigayonan man nga mapalambo ug maatiman ang bisan unsang gipiyal kanato. Mahimong maglambigit kini

Panahon, salapi, talento.

Panahon. Ang panahon molabay ra gyud dayon. Matud pa sa linatin: “Tempus Fugit!” kun time flies. Unta dili nato usikan ang matag gutlo sa mga walay hinungdang mga binuhatan. Ato kining gamiton aron mamahimong magmabungahon ug magmapuslanon alang sa kaugalingon ug alang sa uban.

Salapi. Dili dautan ang maghupot og salapi labina kun kini atong hinagoan. Ang salapi matud pa, Good Servant labina kun sugoon ug gamiton alang sa kaayohan sa kadaghanan. Apan dangerous master kini siya kun kita mamahimong ulipon niini. Kun maulipon kita niini mahikalimot kita nga dunay uban.

Talento. Mahimong sabton nato kini ingon nga skills. Daghan sa mga tawo ang wala makaamgo nga duna silay talento ug kun nakaamgo man wala pud nila kini gamita. Ang talento panalagin gikan sa Dios. Ang matag panalangin gamiton alang sa kahimayaang Diosnon ug alang sa kaayohan sa kinabag-an. Angayang gamiton aron mapahimuslan.

Angayang gamiton aron daghan ang malipay.

Ang piniyalan paninglon gyud. Andam ba kita sa paghatag og husay sa bisan unsa nga gipiyal kanato sa Dios?

Show comments