Walay permit, walay panaygon?

Matag abot sa buwan sa Disyembre, usa sa mga labing maanindot nga talan-awon ug madungog sa atong kadalanan ug kabalayan mao ang tingog sa mga manaygonay.

Gikan sa mga bata nga nagbitbit og ginama-gamang tambol gikan sa lata ug tansan, hangtod sa mga koro sa simbahan ug kabatan-onan nga nagtuyok sa mga barangay, ang panaygon kabahin na sa dugo ug kultura natong mga Sugbuanon.

Apan karong tuiga, ang maong naandan nga tradisyon gisugat sa usa ka higpit lagda gikan sa kagamhanan sa Syudad sa Sugbo: Walay permit walay daygon?

Ubos sa mando ni Mayor Nestor Archival, ang tanang grupo o indibidwal nga nagplanong manaygon sa syudad kinahanglan nang magparehistro sa Business Permits and Licensing Office (BPLO) sa City Hall, gitumong kini aron mailhan kung kinsa ang mga nanaygon, mapugngan ang pagpamugos sa mga residente sa paghatag og kwarta, ug masumpo ang mga dautang elemento nga mogamit sa panaygon isip takoban sa pagpangawat o pagpanulis.

Sa pagtan-aw sa katuyoan sa maong kamandoan, dili ikalimod nga aduna kini maayong tumong. Tinuod nga sa paglabay sa katuigan, adunay pipila ka mga grupo nga nakapawala sa tinuod nga diwa sa Pasko—mga manaygonay nga mamugos, masuko kung gamay ra ang ihatag, o maghatag og kahadlok sa mga sumasakay ug tagbalay.

Ang pagpatuman sa kahapsay ug seguridad katungdanan gayod sa atong mga lider sa syudad.

Apan sa pikas bahin, angayan usab natong timbang-timbangon kung ang maong pamaagi makatarunganon ba ug haom sa kahimtang sa kasagarang Sugbuanon. Ang pagpaadto sa tanang manaygonay sa BPLO sa City Hall usa ka bug-at ug hasol nga proseso. Dili tanang manaygonay mga dagkong organisasyon nga adunay pundo ug pormal nga papeles.

Kadaghanan kanila mga yano nga mga bata sa sityo nga nagtigom lang og gamayng pinaskohan pinaagi sa ilang pagkanta. Kung ipatuman kini sa walay pagpihig, hayan mamatay ang usa ka bililhong tradisyon tungod lang sa kahadlok nga dakpon o badlungon kay walay permit gikan sa City Hall.

Kung tinuod nga ang tumong sa syudad mao ang pag-ila sa mga manaygonay ug pagmentinar sa kalinaw, dili kinahanglan nga lisod-lisoron ang katawhan. Mas praktikal unta kung ang pagparehistro ihatag na lang ngadto sa lebel sa matag barangay. Ang mga opisyal sa barangay ug mga tanod mas nakaila sa ilang mga lumulupyo.

Mas sayon alang sa mga bata ug gagmayng grupo ang pagkuha og pagtugot o clearance sa ilang barangay hall kaysa mobiyahe pa ug maglinya sa City Hall. Dugang pa niini, kinahanglan usab nga himuong libre ang maong permit, aron dili kini mahimong dugang palas-anon sa mga kabus nga gusto lang maglipay sa panahon sa Pasko.

Ang balaod ug regulasyon gihimo alang sa kaayohan sa tawo, dili aron ihikaw ang yano nga kalipay sa katawhan. Hinaut nga sa pagpatuman niining “Walay permit, walay caroling” nga patakaran, dili makalimtan sa atong mga opisyal nga ang Pasko panahon sa pagsinabtanay, pagkamanggihatagon, ug pagpreserbar sa atong kulturang Sugbuanon.

Sa mga tawo usab gikinahanglan nga dili sakyan ang okasyon aron mohimo og mga lakang nga iya sa mga tampalasan nga himoong katarogan ang pasko aron sila makapwerhisyo sa isig ka tawo kay mas labaw nga mawala ang diwa sa Pasko.

Show comments