Ambot og ignorante o gibogoan ba lang gyud sa mga Sugboanon ang administrasyon ni Mayor Nestor Archival aron ipahibawo sa publiko ang ilang sugyot nga aron kuno masulbad na ang problema sa syudad sa labayanan og basura ug mobalik na sa pagsalmot sa bidding ang management sa Binaliw landfill, angayang mosang-at og “friendly case” ang Prime Integrated Waste Solution (Primewaste) aron kolektahon ang P130 million nga utang sa dakbayan.
Si Kenneth Siasar, chief of staff ug tigpamaba ni Mayor Nestor Archival, mihimo niining maong sugyot aron mapugos kuno sila og bayad sa utang sa kanhi administrasyon nga maoy ilang gitan-aw nga usa sa mga hinungdan nganong wala na moapil sa bidding ang Binaliw landfill.
Daghan na nga higayon nga nihimo og bidding ang dakbayan alang sa labayanan og basura apan way mga nisalmot. Ang Binaliw nga maoy labing duol nga mahimong labayan sa syudad og basura wala na moapil tungod kay dako pa og utang ang syudad.
Ang administrasyon ni Archival dili mobayad tungod kay giingong dili kumpleto ang mga dokumento. Busa aron pagsulbad sa problema gusto nilang mokiha ang primewaste aron pugson ang syudad nga mobayad.
Sigun ni Siasar, mapugos kuno ang dakbayan og bayad sa P130 million nga utang bisan way klarong papeles kun ang korte na maoy momando. Tan-awa og unsa ka yabag ang maong sugyot. Nahibawo na silang daan nga kwestiyonable ang mga papelis sa kontrata. Sa ato pa lalisonon tinuod ba gyud nga utangan ang syudad sa maong kantidad. Apan gusto nilang dalhon sa korte, para unsa? Aron adto nila areglohon pagsalbar sa ilang kaugalingon?
Kun dili kapakita og papelis ang landfill management pagmatuod nga balido ang ilang claim sa syudad, unsaon man nila pagkumbinsir ang korte? Makig-areglo nalang ang syudad aron lang gyud mabayran ang landfill sa kwestiyonable nga utang tungod sa kadisperado sa kagamhanan pagpangita og luna nga kalabayan og basura? Ang tinuod di gyud ko komportable sa mga pamahayag sa City Hall nga daw hapit nalang moluhod sa pagpakiluoy nga unta moapil na sa bidding ang Binaliw landfill. Dili ba ni klaro nga pagpakita nga duna silay gipaboran?
Nakasabot ko nga desperado ang dakbayan tungod sa kadako sa gasto sa paglabay sa basura didto sa Aloguinsan.
Apan dunay sagradong proseso nga angayang tahoron ug sundon sa pagsulod og kontrata nga dili mahimong makompromiso.