Ang Joint Venture Agreement (JVA) tali sa Cebu City government ug Tokagawa Global Corporation kabahin sa pagkolekta og parking fees sa mga sakyanan nga mo-parking daplin sa mga karsada, matapos na karong Enero 2027.
Mahuman na ang lima ka tuig nga kontrata nga gipirmahan sa kadagkoan sa Tokagawa ug ni kanhi Cebu City Mayor Michael Rama, ug kini dili na gyud angay’ng bag-ohon pa ang kontrata.
Gihulagway sa Commission on Audit (COA) nga nabentahaan ang Cebu City government niining mao nga kontrata diin gilatid nga ang siyudad modawat ra og 22 porsiyento sa kinatibuk-ang koleksyon sa parking fees, samtang 78 porsiyento ang mahipunta sa Tokagawa.
Gihulagway usab sa COA nga supak sa balaod ang paghatag sa Cebu City og katungod ngadto sa Tokagawa Global Corporation nga maoy mangolekta sa parking fees sa mga sakyanan nga moparada sa karsada nga iya sa gobiyerno.
Ang Local Government Code of 1991, Section 130 (c), nag-ingon nga ang pagkolekta sa buhis, fees, ug charges, "shall in no case be let to any private entity."
Apan bisan pa og ang COA mihatag na niining mao nga pasidaan ngadto sa mga opisyal sa Cebu City, ang mga opisyal sa siyudad nagpakabuta-bungol lang ug wa magtagad.
Daghan ang nabalaka nga tingali’g duna na say mga opisyal karon sa siyudad nga ubos sa administrasyon ni Cebu City Mayor Nestor Archival nga magtinguha nga i-renew na usab ang maong kontrata.
Pwerteng alkanseha gyud sa siyudad niining JVA nga gisudlan nila uban sa Tokagawa, ang kompaniya nga nag-hire og mga roadside parking collectors nga nagsul-ob og T-Shirt nga dagko kaayo’g marka nga CEPMA.
Nganong ang dako kaayo nga bahin sa koleksyon mahipunta man sa Tokagawa nga wa man sila’y mga parking equipment nga gipangbutang diha sa mga karsada?
Igo ra ang Tokagawa nga nagbutang og mga collectors nga mangolekta sa parking fees gikan sa mga tag-iya og sakyanan. Matud sa uban nga tabla ra kini nga gihatagan sa mga opisyal sa Cebu City og higayon ang Tokagawa nga makanegosyo gamit ang karsada sa siyudad.
Nganong dili na man lang ang Cebu City Transportation Office (CCTO) maoy modestino og mga parking collectors alang sa pagkubra sa parking fees? Kon himoon kini sa mga opisyal sa siyudad, dako pa kaayo ang kitaon sa Cebu City government.
Di sab hinuon ko moingon nga dunay nasubornohan sa mga opisyal sa siyudad kaniadto mao nga gitugotan nila nga maaprobahan kini nga JVA.
Kay mahuman na man gyud ang kontrata sa siyudad ug Tokagawa, maayong ang CCTO na lang gyud maoy tugyanan nga mangolekta sa parking fees.