Giangkon kuno ni Senador Loren Legarda nga nasayop siya sa iyang hukom nga didto nakig-alyado sa pundok nga gipangulohan ni Senador Allan Peter Cayetano.
Base sa balita, si Senador Panfilo Lacson maoy mitug-an niini kay nagkahinabi kuno sila ni Loren nga tua pa karon sa France nagpatambal kuyog sa iyang anak nga si Kongresista Leandro Leviste.
Sa ato pa, kon mahitabo nga mopauli na si Loren dinhi sa nasud, adto na siya makig-alyado sa mga senador nga habig sa administrasyon nga gipangulohan ni Senador Sherwin Gatchalian.
Kon mahitabo kini, mahimo na nga 14 ka senador ang alyado sa administrasyon ug base sa nauyonan nga threshold nga makapakonbikto ni Vice President Sara Duterte, kuha na kaayo nila.
Makaingon ta nga sigurado na nga konbikto si Sara sa Senate impeachment court kay kon 20 ka senador ang manunga, ug maoy maisip nga legal nga makabotar, 14 na man sila.
Apan nganong kalit ra man nausab ang baruganan ni Loren ug miingon nga nasayop siya sa pakig-alyado sa pundok ni Cayetano? Dunay mga nangagpas sa posibleng rason.
Matud sa mga tigpaniid nga gitagna na nila daan nga duna g’yuy mobali nga senador gikan sa pundok oposisyon, ug kini mao kadtong mga senador nga dunay giatubang nga kaso.
Nasayod na baya ta nga si Loren ug ang iyang anak, dunay giatubang nga kaso sa Ombudsman. Pananglit ang Ombudsman moduso niining maong kaso ngadto sa Sandiganbayan, dakong problema.
Tan-awa og unsay gihimo ni Senador Joel Villanueva nga gisugdan na unta pag-imbestigar sa Ombudsman. Takulahaw lang nga si Senador Villanueva mibuwag sa pundok ni Cayetano ug miipon sa pundok sa mga senador nga kaalyado sa administrasyon.
Tuod man, nahilom ang iyang kaso. Kadtong mga senador nga wa dayon makalukso sa pikas grupo, aw nalutsan gyud og warrant ug nabilanggo.
Makaingon ta nga kon tinuod man ang gisulti ni Senador Lacson, unya molukso si Loren sa pundok sa administrasyon, wa nay laing rason niini.
Dili sayon kon mabilanggo ka, unya ang kaso way piyansa kay adto ka gyud mamasko sa bilanggoan.
Mao kini ang rason nga nakaingon ko, ang katawhan nagtan-aw sa isyu nga ang Senate Blue Ribbon Committee wa na gyud magpahigayon og hearing kabahin sa mga anomaliya sa paghimo og flood control project.
Ang gihimo unta sa mga senador mao nga samtang maghimo sila og impeachment trial sa Lunes, Martes ug Miyerkules, ini’g ka Huwebes ug Biyernes, ang Senate Blue Ribbon Committee maghimo sab og hearing kabahin sa anomaliya sa paghimo og flood control project.
Kon dili nila kini himoon, matan-aw sa mga tawo nga pagpanggukod ra gyud ang ilang gihimo.