Maayong balita gikan sa Energy Regulatory Commission (ERC): Mobarato ang bayranan sa kuryente sa Sugbo, Kabisay-an ug Mindanao karong buwana. Nipasalig pa gyod nga dili ordinaryo nga laslas ang ipatuman: Kapin sa P10 kada kilowatt-hour (kWh). Sa ato pa, sa mga panimalay nga mo-konsumo og 500 KWH, labing menos P5,000 ang tibugsok sa bayranan.
Daotang balita gikan sa power distributors: Kapin sa P6 kada kWh ra ang aktuwal nga us-os. Labawng ngil-ad: Walay katin-awan nganong wala mahinayon ang mas dakong laslas nga gisaad sa ERC.
* * *
Niang mga numero nga gipahibawo sa ERC sa niaging buwan nga ilang gisugo nga ipatuman dayon ug mao nay gibasehan sa bills sa Septiyembre sa power distributors:
Ang bayranan sa kuryente sa Sugbo, Bohol, Leyte, Negros ug ubang bahin sa Kabisay-an imbes nga P18.49 kada kWh sa buwan sa Agosto ubos sa karaang formula mahimo na lang nga P8.47 kada kWh ubos sa bag-ong formula; samtang
Ang bayranan sa kuryente sa Mindanao imbes nga P19.56 kada kWh sa buwan sa Agosto ubos sa karaang formula mahimo na lang nga P8.69 kada kWh ubos sa bag-ong formula.
* * *
Pero lahi ang aktuwal nga mga numero sa Visayan Electric, ang distributor sa kuryente sa Metro Cebu, nga gibutang sa bills nga gi-apud-apod ngadto sa ilang mga kustumer para sa Septiyembre:
Ang residential rate ni-us-os ra og P0.07 kada kWh sa Agosto (gikan sa P14.96 kada kWh ngadto sa P14.89 kada kWh); pero
Mas dako ang laslas, niabot og P6.35 kada kWh, kon ikumparar sa aktuwal nga sulbong sa bayranan ngadto sa P21.24 kada kWh.
* * *
Nipasabot ang ERC nga ni-us-os ang bayranan sa kuryente sa Kabisay-an ug Mindanao kay wala na ipasikad sa nasudnong average (nga nabira paubos tungod sa kabarato sa kuryente sa Luzon).
Sa ato pa, nasobrahan ang binuwan nga bayranan sa kuryente sa mga konsumidor sa Kabisay-an ug Mindanao sukad sa pagsulbong sa presyo niadtong Abril (tungod sa Iran war). Dili ba makiangayon lang nga ang ERC, kay sila man ang naka-diskubre sa sayop nga formula, motakda na sa mga lagda sa pag-refund sa gitikasan nga mga konsumidor?
* * *