Usa ka talagsaong kahigayonan alang sa Pilipinas ang pag-host niini sa Pax Silica, usa ka technological infrastructure project nga gitan-aw nga makahatag og dakong kalamboan sa ekonomiya sa nasud.
Mahinungdanon kini tungod kay ang Pilipinas lamang dinhi sa Southeast Asia ang gitanyagan sa maong proyekto. Usa kini ka dakong bintaha nga dili angay palabyon sa nasyonal nga kagamhanan.
Niining panahon nga daghang nasud ang naningkamot pagdani og dagkong puhonan, ang Pax Silica dako nga oportunidad sa nasud nga makamugna og mga trabaho ug dugang kita sa gobiyerno.
Hinuon dili nato kalikayan ang mga kabalaka sa ubang sektor sa posibleng epekto sa kalikopan sa mao nga proyekto. Kini wala pay labot sa mga lumad nga komunidad nga mahimong maapektohan niini.
Tinuod nga ang pag-uswag sa ekonomiya sa nasud kinahanglan nga dili magagikan sa dakong kadaot nga mahiagoman sa kalikopan. Kini ilabina kon liboan usab sa katawhan ang maapektohan.
Apan imposible usab nga ang kagamhanan walay pagpakabana sa isyu sa kalikopan ug mga lumad nga giingong maapektohan sa Pax Silica. Wala man siguroy rason nganong magpasagad kini sa bahandi sa nasud aron lamang aron lamang pag-accommodate sa langyaw'ng mamuhonan.
Ania na kita sa modernong panahon diin adunay daghang paagi sa pagprotiher sa katungod sa katawhan ug kinaiyahan.
Ug ania na usab kita sa modernong panahon diin ang mga mamumuhonan adunay katakos pagprotiher sa kalikopan ug katawhan.
Ang pangutana kon dako ba ang tabang sa Pax Silica sa ekonomiya sa Pilipinas, dili ikalalis nga dako. Mao nang usa kini ka dakong oportunidad nga dili angay palabyon. Nganong dili man nato hatagan og higayon?