Dili palang dugay, gipahibalo sa kapolisan ang resulta sa ilang mga imbestigasyon sa mga pagpanghulga sa nagkadaiyang mga eskuylahan nga maoy nakaingon sa pagkabalda sa mga klase, gani ang uban naabtan gyud og pipila ka adlaw ayha pa nabalik ang klase sa mga bata.
Nigawas sa imbestigasyon sa kapolisan sa Cebu Provincial Police Office nga kadaghanan aning mga pagpanghulga nga gi-post sa social media o direktang gi-send pinaagi sa messengers, modus ra diay.
Modus kini sa mga estudyanteng tapulan magtuon, tapulan mohimo og projects o assignment ug hadlok nga pabarugon sa atubangan alang sa indibidwal nga reporting sa ilang klase.
Kani ilang pagpanghulga, sa sinugdanan nakapabalaka gyud sa mga magtutudlo ug sa mga tagdumala sa mga eskuylahan.
Apan nasuta sa pagsubay sa imbestigasyon sa mga polis, nasuta nga sagad sa mga nanghulga mga menor de edad nga gustong makaikyas anang ilang mga eksaminasyon, long quizzes, reporting, deadline sa assignments o project ug uban pa.
Sa pagsugod aning sagunson nga mga pagpanghulga, naa na gyud daay pagduda nga binuang ra kini, apan tungod sa mga bayolenteng nahitabo sa ubang mga eskuylahan sa ubang mga lugar sa nasud diin naa gyuy nakalas, nasamdan ug uban pa—masabtan ang seryusong pagtagad sa mga magtutudlo.
Tungod na kay anang mga tungora, pulos pa tanan wala masuhito kun unsay buhaton ug unsaon ni pagkombate. Maayo nalang nga gipangusgan pud sa kapolisan ang ilang imbestigasyon ug natabangan ang mga eskuylahan. Karon kung naay laing mga pagpanghulga, mas dali na ang koordinasyon.
Husto ang sugyot sa usa ka konsehal sa Cebu City nga dili angay magdeklarar og klase ang mga eskuylahan hangtud dili maberipika sa kapolisan kung tinuod ang hulga.
Kaning mga pagkabalda sa klase, nakaapektar ni sa paglambo sa pagtuon sa mga kabataan. Naay mga batang tabangunon kaayo sa leksyon ang masamutan og kabiyaan sa klase.
Dili lalim para sa mga magtutudlo ug mga estudyante ang kalit-kalit nga mo-adjust ngadto sa modular classes o online classes tungod kay lahi ra gyud ang face to face classes.
Karon, kinahanglang seryusohon gihapon sa DepEd ug sa PNP kaning mga walay lingaw ug magbinuang nga mga tinun-an, tinuod man ang hulga o binuang ra, aron motagam.