EDITORYAL — Urban Forest Park

Ang mga punoan sa kahoy ug mga tanom dako og tabang para mamenusan ang polusyon sa hangin. Nagsilbi kining salaan sa polusyon gikan sa mga aso sa mga sakyanan samtang naghatag sab kini og preskong hangin.

Gawas pa niini, makapanindot pa gyud kini sa talan-awon sa palibot, dunay uban nga mamunga ug makahatag og pagkaon sa tawo ug sa mga mananap.

Apan sa mga dagkong siyudad sama aning sa Cebu City, nagkaanam og kagamay ang mga kahoy nga makita, ilabi na sa downtown  ug uptown areas tungod sa padayung pag-ugmad sa nagkalain-laing mga imprastraktura ug mga konstruksyon sa mga pribadong mga luna.

Putol diri, pul-ong didto sa mga punoan sa kahoy hinungdan nga ang ilang dapit pwerte nang inita ug wala nay presko ug bugnaw nga hangin.

Dali sab mosaka ang tubig baha sa ilang dapit kay kadtong giibtan og kahoy gitabonan na og semento para sa ilang parkingan ug uban pa.

Usa ka maayong lakang kining usa ka ordinansahon nga giduso diha sa Cebu City Council ug kinahanglang mapasar kini ug mahingpit nga usa ka ordinansa.

 Kani nga ordinansa nagmando sa mga developers nga kinahanglang apilon sa ilang project plans sa ilang mga konstruksyon ang mga tanom ug mga punoan sa kahoy.

Nindot kaayo ni tungod kay mapugos ang mga developers pagtuman ani kay kung dili, dili sila mahatagan og permit.  Dako kining hagit para adtong mga gagmay lang og luna ug gustong okupahon sa ilang tukorong building ang kinatibuk-an ani, asa man sila mananom?

Kinahanglan kining pangitaan sa siyudad og luna kun asa sila pwedeng patamnon agi og baylo sa unta bahin sa ilang gitukoran og building para tamnan og mga kahoy.

Apan dunay maayong solusyon ani, pwede kaayong mogahin og pipila ka ektarya ang gobiyerno sa Cebu City diha sa South Road Properties aron himuong urban forest park. Kadtong mga developers pwedeng adto motuman sa rekisitos pinaagi sa pagsagop og usa ka bahin sa urban forest park diin sila motanom og mga kahoy nga ilaha sab atimanon hangtud modako.

Aning paagiha, makabaton ang siyudad og kalasangan diha sa SRP nga makatabang sa kalikopan.