Cybermodus naa na sa Sugbo

Hilabihan ka viral karon ang giingong love scam hub nga natribokar sa social media diin nahitabo kini sa sulod sa usa ka establismento sa dakbayan sa Sugbo. Hilalibihan ka klaro ang dagway sa mga nanarbaho sa murag estilo sa business process outsource kon BPO.

Kinsay magdahum nga naa ra diay kini sa sentrong bahin sa usa ka highly urbanized city?

Magsige kita og ka kita sa mga balita sa ubang nasud nga naay mga Pinoy nga nangailad ug didto nanarbaho sa Cambodia, Myanmar ug ubang nasud sa Asya isip mga scammer, apan naa ra diay kini sa atong nataran.

Kong wala pa natribokar sa usa ka hacker vlogger padayon pa gyud unta ang ilang tinonto sa pagpamiktima sa mga langyaw nga target nila. Nagpakuwaw lang ni sila sa imahen sa Sugbo.

Kinsa man ang nagpasiugda niini? Dili kini bastabasta nga makatukod og ingon niini kong walay mga nagpaluyo kanila.

Dihang nag-operate ang kapolisan uban ang BPLO uwahi na ang tanan kay nakaikyas naman ang mga nagtrabaho ug samot na ang dagkong tawo nga nagtukod ining negosyo sa pagpangilad. Igo nalang sa pagpadlak ang gihimo sa mga awtoridad ug pagsummon sa mga nalambigit, ambot kong motunga pa ba sila.

Niadtong nakalabay’ng semana, 17 ka Taiwanese usab ang nadakpan sa NBI Manila sa usa ka high end subdivision nga sama gihapon nga modus ang romance scam kansang mga biktima mga kadugo ra usab nila.

Ang unom sa mga dinakpan mga wanted sa Taiwan ug lider sa dakong crime group ug mipalipang sila diri sa nasud, didto sa kaulohan. Apan dihang gipuhag sila didto dinhi sa Sugbo na usab sila nibalhin sa ilang tinonto.

Dakong hagit karon sa mga bag-ong napili sa puwesto ang pagsulbad niining problemaha kay dili lang kini sila mao kon dili adunay daghan pa.

Maayo unta maapil pud sa pag gukod kinsa ang mga local contact nila kay segurado nga aduna gyuy silay mga padreno nga taga atoa.