EDITORYAL- Kinsay angay basulon?

Duha ka mga menor de edad ang nakalas sa aksidente sa motorsiklo sa lungsod sa Argao, wala sila mabanggai og motorsiklo kondili sila mismo maoy nagdala sa motorsiklo nga nabangga sa kasugat nga bus pasaheroan.

Ang nakadugang sa problema, ang nagmaneho sa motor 12-anyos pa nga lalaki ug ang angkas 17-anyos nga babaye. Gikataho nga hubog ang drayber kay padung mangaligo og dagat ug parehong walay mga helmet.

Sumala pa sa kapolisan sa Argao, upat gyud unta ang sakay sa motor, apan tungod kay hubog ang batang drayber nanganaog ang laing duha ka babaye (nga posibleng mga menor de edad sab) ug nanakay nalang bus padung sa ilang padulngan.

Kung wala pa maangheli ang duha, wa pat siguro naapil sila.

Dili na bag-o kining mga ingon niini nga talan-awon, mga batang magmaneho og motor unya dili magsuot og helmet.

Walay kurat kun makakumot sa gasolinador ug magwili-wili pa gyud og maneho diha sa dalan bisan dunay mga angkas.

Basi sa Traffic Code of the Philippines, kinahanglang 16-anyos na una pa makatuon og maneho ang mga bata apan limitado lamang sa student permit ug kinahanglang aduna kini kaubang professional o non-professional driver.

Dili pwedeng ang mga polis lang maoy basulon nganong dunay mga kabataang wala pa sa edad nga magmaneho na og motor diha.

Angay basulon ang mga ginikanan ug kun kinsay tagiya sa mga sakyanan o motor nga gigamit nga nalambigit sa aksidente. Angay nga silay manubag sa kadaut nga nahimo sa ilang mga anak.

Angay sab basulon ang ilang mga barangay officials, ug bisan ang mismong lokal nga mga residente diin magpuyo kining mga batang magmaneho og motor nga walay mga lisensiya ug reckless kun mo-drayb.

Dapat sila mismo maoy unang mobadlong ini og kakita palang nila. Dili kini para lang sa kaluwasan aning mga bataa kondili para sa tanan kay dili ikalimod nga posibleng makadisgrasya sab kini sa ubang mga bata ug mga tawo diha sa dalan sa ilang mga barangay.