Limod hangtud 'matay

Mitanyag si PCSO General Manager Melquiades Robles nga mo-resign sa iyang katungdanan kon mapatud-an nga ang mga bola sa lotto mahimong mani-obrahon.  Hugot ang pagpanghimakak ni Robles sa mga alegasyon batok kaniya ug sa ahensiya ug gitawag pa kini niya nga “fake news.”  Sa ubang nasud, anaa pa kanila ang kultura ug kinaiya sa kaulaw kay sa diyotay lang nga pasangil, modayon man ang opisyal pag-resign o ba kaha mag-suicide. Apan dinhi sa Pilipinas, uso gihapon ang pagya nga “Limod hangtud ‘matay.” Nahisama sila sa langgam nga uwak nga bisan nag-tangag, moingon gihapon nga “Waa, waa, waa.” Fezteleern!

Dili magpunay’g pananghid

Alang kang Cebu Mayor Michael Rama, dili tanan nga bulohaton sa kagamhanan kinahanglan ipananghid pa sa konseho ilabi na gayud kadtong mga interbensiyon nga motubag sa mga emerhensiya. Praktikal ang panahom sa mayor. Sa panahon sa emerhensiya, dili kinahanglanon ang dugang burukrasya kon dili ang dinalian’g aksyon.  Makapahinumdum sa kihante nga gipangutana sa huwes kon unsa’ng orasa siya gibun-og sa mga akusado. Tubag sa kihante nga, “Buot ba nimo ipasabot Nyor Huwes nga, samtang nagkapuliki ko’g sagang sa ilang mga kumo ug mga bunal, motan-aw pa ko sa akong relo?” Pagkatoytoy!

Disgrasya o karma?

Nakabsan sa iyang kinabuhi ang usa ka construction worker sa dihang naunay siya sa live wire nga iyang gigamit aron unta pagpanakop og isda’ng halwan sa sapa didto sa Barangay Canlumpao, Toledo City, Cebu.  Gidili ang maong paagi sa pagpanakop og isda tungod sa mahimong kadaut niini sa kalikopan ug sa mogamit niini.  Disgrasya man o karma, angayan nga panaminan sa uban kini’ng hitaboa.  Mao kana’y giingon nga, “Mahimong malimot ang atsa sa iyang gibuhat, apan ang kahoy dili. Ang kapalaran adunay iyang kaugalingon’g paagi kon unsaon pagbayad”.  Muleeng!

Mura’g attorney ra

Usa ka senior citizen ang gisikop sa mga operatiba sa NBI didto sa Naic, Cavite tungod sa pagpaka-aron-ingnon niini nga usa ka abogado ug notaryo-publiko.  Nasayran usab nga ang maong impostor nadakpan ug nabilanggo na kanhi sa susamang salaod.  Makapahinumdum kini  sa usa ka panghitabo sa korte diin ang usa ka impostor nga “abogado” gipakuha una sa huwes og pagtugot gikan sa Korte Suprema una siya mopadayon sa pagpanglaban sa iyang mga kliyente.  Mapasalamaton kaayo ang kaatbang nga abogado sa gimando sa huwes kay matud pa niya, “Lisod kon pildihon lang ‘ta og wala pa makapasar sa Bar”.  Madahaan!

Depektoso ang philid

Gikataho nga adunay daghan depekto ang national ID o PhiIID nga gi-isyu sa Philippine Statistics Authority.  Ginaingon nga daling mapapas o mapaksit ang mga detalye sa pagkatawo sa tag-iya sa ID ingon man sa nawong nga napatik unta sa ID busa daw wala kini kapuslanan. Dili pulido ang pagkabuhat sa maong mga ID ug nanimaho ang kurapsyon sa maong transaksyon.   Kining depekto sa PhilID nga dali mapaksit ang nawong, makapahinumdum kanato sa linya sa awit nga “Kausa Nabasa ang Tubig” nga nagkanayon, “Kinsa ikaw sunog nga hulagway….mga lingin’g pangutana, Kinsa ka o Kinsa ka?”  May’pag moligeed!