Ang krus na gipas-an sa usa ka inahan

Niining pagtimaan sa Semana Santa, usa ka inahan ang daw nakaambigit sa kasakit nga gibati sa atong Manunubos nga hilabihan gyud ka sakit dihang ang iyang kamanghoran nga anak ang napatay sa kaugalingon niining amahan sa Sitio Lower Laguerta Baranggay Lahug sa Dakbayan sa Sugo.

Ang anak naa karon gihaya samtang ang amahan tua sa bilanggoan nagtingkagol nga gihulagway sa inahan nga sama ka pait sa apdo ang iyang natilawan nga inig hilak niya wala nay luha nga moagas kay nagpasulabi ang nagdugo niyang kasing kasing.

Nagsugod ang tanan dihang giingnan sa inahan ang iyang anak nga pagngon ang suga sa gihimong payag niini aron makadaginot lagi sila sa kuryente apan nasuko ang anak ug gipasakitan sa pag estorya ang inahan niini.

Dihang nakadungog ang amahan, gibadlong ang anak nga dili tubagtubagon ang inahan, apan inay maminaw nikuha naman hinuon kini og dos por dos nga kahoy ug gihapos sa liog sa amahan nga maoy hinungdan na nasarasay kini tungod sa kakusog. Nagtuo ang amahan nga tiwasan siya sa iyang anak maong gikuha niini ang iyang tinagoan nga pusil ug pasalbahan unta ang anak apan didto sa ulo naigo ang bala nga misangpot sa kamatayon sa pinalanggang anak.

Gibutyag sa inahan nga nagumon sa bisyo sa drugas ang anak ug kong anaa kini sa ulipon sa drugas mohimo gyud kini og mga dautang lakang ngadto sa miyembro sa ilang pamilya ug bisan sa ilang mga silingan. Gani nabilanggo na kini kaniadto apan tungod lagi kay anak nga gimahal ila usab nga gitabangan nga makagawas.

Karon niabot ang panahon nga nagbayad ang anak sa dautang binuhatan apan hilabihan man ka mahal nga gibugtian sa iyang kinabuhi ug sa pagkaamong sa iyang amahan nga maoy namansahan ang kamot sa dugo sa kaugalingon niyang anak.

Ang tinubdan sa problema ang bisyo sa illegal nga drugas nga niguba sa kinabuhi sa usa ka pamilya. Ingon niini ka grabe ang resulta sa pag gamit sa illegal drugs nga hangtud karon wala gyuy paghubas. Nakahukom ang pamilya nga dili nalang mokiha sa ilang padre de pamilya kay dili man kuno intention niini nga patyon ang anak.

Bisan og dili mosang-at ang pamilya og kaso batok sa amahan apan ipadayon gihapon sa kapolisan ang reklamo kay mao man kini ang tahas nila ug depende nalang unya sa hukmanan ang mamahimong desisyon sa kaso.

Bisan og dili siya mapasakaan og kaso apan ang bug-at nga silot nga hambinon sa amahan ang iyang kaugalinong pagbasol sa nahimo ngadto sa iyang anak, hangtud sa hangtud nila kining pas-anon.