Sa akong pagtagik ning maong pamalandong gibati ko og tumang kasagmuyo sa akong panaw padulong sa Barili gikan sa siyudad.
Kini tungod kay akong gi target gyud unta nga kun mahimo moabot ko sa dapit sa tukmang panahon.
Apan unsang pagka unsaa nga naguba man ang tambotso sa sakyanan nga akong giabangan mao nga nausab gyud ang dagan sa panahon.
Pun-an pa sa trapiko nga duot kaayo mao nga nisamot gyud og kalangan ang akong lakaw.
Makasapot gyud kaayo. Dakong kauwaw nga magpaabot og dugay ang katawhan.
Apan unsaon ta man nga dunay mga hitabo nga dili gyud nato kapugngan bisan unsa pa nato kaandam. Sa maong hitabo akong napamalandongan kining mosunod:
1. Mahinungdanon ang pagpailob. Kun wala ang pagpailob lisud ang panahon.
2. Dunay rason tingali ang pagkalangay wala ta masayud nga diha sa kalangay mas mapamalandongan nato ang hitabo sa atong kinabuhi.. dili baya usahay lalim ang masipyat diha sa atong pagdali dali.
3. Usahay diha sa kapaspas nahikalimot kita sa bili sa paghinay aron makahimo kita og balik lantaw sa atong kagahapon ug sa atong tinud-anay nga kahimtang. Subo pamalandongon apan mao ang matuod.
4. Nahinumdom ko ni Propeta Elias nga nakasinati sa Ginoo dili diha sa linog ug kusog nga hangin hinunoa iya siyang nasinati diha sa malinawong huyohoy sa hangin.
Unta mahatagan ako sa grasya nga mohinay diha sa kinabuhing espirituhanon aron akong matagamtam ang presensiya sa Dios diha mismo sa akong kinabuhi. Hinaut pa unta.
Salamat sa pagsabot mga taga Barili ingon man sa mga kaparian nga maantosong naghuwat. Panalanginan unta kamo sa Dios Amahan.