Giawhag ni Senador Risa Hontiveros nga kondenahon sa Malacañang sa labing “kusganon’g pulong” ang padayon nga pagpanghasi sa China diha sa West Philippine Sea. Dugang sa senador, dili angay magpaabot nga aduna’y Pinoy nga mamatay una pa kita mohimo’g lakang. Kon diplomatic protest ang gipasabot ni Senador Hontiveros, sayod siya nga wala kini epekto. Kaisog ang gikinahanglan kon ang tawo mobarug og motingog, apan kaisog usab ang gikinahanglan kon ang tawo molingkod ug mamati. Kay ginaingon man nga “Ang paningkamot ug kaisog dili paigo kon kini walay katuyoan ug padulngan.” Muleeng!
Magtubig-tubig lang una
Namahayag usab si Senador Jinggoy Estrada kabahin ni’ng maong hisgutanan, nga dili makasugakod ang Pilipinas nga makig-gubat sa China busa modangop lang gihapon kita sa diplomasya. Midason si Senador Bato de la Rosa sa pamahayag ni Senador Estrada dugang ang tambag sa pagbaton og pailob.
Ni’ng ‘bullying’ nga gibuhat sa China, dili haum kanato ang mga panultihon nga “mosukol man gani ang hulmigas” ug nga “mobalos man gani ang binugha”. . Busa padayon lang una kita sa diplomasya samtang nakigdula ang atong Coast Guard sa Chinese Coast Guard og “tubig-tubig.” Fezteleern!
Sex Education
Naglaraw ang DepEd nga itudlo sa mga tinun-an sugod sa Grade 4 level ang sex deducation base sa bag-ong curriculum alang sa K-10. Dili man tingale dautan ang sex education alang sa kabataan, apan adunay mga butang nga dili kinahanglan itudlo kay kini makat-onan ra man. Mas gmaayo pa tingale unahon pagtudlo ug ibalik ang subject nga “good manners and right conduct” (GMRC). Labot pa mahinungdanon ang moral kay sa sexual orientation sa kabataan. Apan kon ipadayon gyud ng sex education sa mga eskwelahan, hangyo lang sa akong amigo nga “Dili lang unta hatagan og homework ang kabataan kabahin niini.” Madahaaan!
‘Tempolary’ kay wa ma-‘legister’
Alang kang LTO-7 Director Victor Caindec, ang “kahangol” sa mga negosyante maoy hinungdan sa pagka-delatar sa pagdawat sa mga tag-iya sa sakyanan sa ilang vehicle registration certi9cate kay naghatag kini’g kasayon sa pag-embargo sa sakyanan kon mapakyas pagbayad ang tag-iya niini. Kon tinuod ang pamahayag ni Caindec, unsa man ang gibuhat sa LTO aron mahunong kining tinonto?
Makapahinumdum sa driver nga migamit og plywood isip plate number sa iyang motor. Sa dihang gipangutana ngano, mitubag ang driver nga, “TEMPOLARY ra na nga plaka Sir, kay wa pa MA-LEGISTER.” Pagkatoytoy!
Ilisan ang pag-ibig
Nabatyagan sa Home Development Mutual Fund kon Pag-IBIG Fund nga nikunhod ang datos sa mi-avail sa socialized housing loan dinhi sa Visayas region sa tuig 2022. Gumikan kini sa kamahal sa galastohan pagpatukod og balay nga naka-discourage usab sa mga developer.
Dili na diay tukma ang kahulogan sa pulongPag-IBIG kay kawad-an na man ang tawo ug gugma sa pagpangutang aron maka-balay. Maayo pa ilisan ang ngalan nga Pag-Ibig ngadto sa binisaya nga tugbang niini nga Pag-Mahal, tungod kay mahal na man ang kantidad pagpatukod og balay. May’pag moligeed!