Labihan nang hugawa sa atong Philippine National Police (PNP), diin ang naghugawhugaw, mga opisyales ra usab. Ug usa kanila, si M/Sgt. Rodolfo Mayo Jr.
Sa usa ka interbiyu, si kanhi PNP chief ug karon Senador Bato dela Rosa, mitug-an unsay iyang gibuhat ni Mayo niadtong siya pay nangulo sa maong ahensiya.
Matod niya: “Yung tao na yan, basta, yung tao na yan, 2016, tinapon po natin yan sa Mindanao. Dahil may intelligence report na yan ay isang ninja cop. Tinapon natin sa Mindanao.
Nagtaka ako bakit nakabalik dito sa Metro Manila at ginawa pang intelligence officer sa PNP Drug Enforcement Group (PDEG), kung saan lumawak pa ang kanyang picture, ang kanyang papel na proliferation ng droga sa bansa.”
Si Mayo kuyog sa iyang kakunsabo, Ney Atadero, nasakpang naghupot og duha ka kilong shabu didto sa Manila, October 8, 2022, diin si Gen, Rodolfo Azurin Jr. na maoy PNP chief.
Ang pagkasikop ni Atadero nakagiya sa kapolisan sa pagkadiskubre pa sa hapit moabot og usa ka toneladang shabu nga didto itago sa lending firm nga gipanag-iya ni Mayo.
Gipagawas ni Secretary of Interior and Local Government (SILG) Benhur Abalos ang CCTV coverage nga mirekord mismo sa maong aktuwal nga hitabo. Diin, iyang naanalisar nga adunay dakong cover-up gikan sa kinatas-ang opisyal sa PNP kining hitaboa. Nga misamot kakontrobesiyal dihang nakita sa footage nga imbes posasan si Mayo, gitangtangan pa hinuon.
Protocol sa bisan unsang legal organization nga ang top officials updated kanunay sa mga panghitabo ug sa mga planong buhaton.
Kinahanglang magpaabot silag GO-signal gikan sa kinalabwan, ayha pa buhata ang nahunahunaang operasiyon.
Dinhi nagkulang si Azurin, Klaro kaayo nga wala niya pahibaw-a si Abalos, kinsa mao ang direkta niyang labaw bahin niining hitaboa.
Kay kon gipahibalo pa niya, dili gyod unta sila magkalalis-away. Gani, ning iyang gibuhat, nahimo man siyang walay tahod ni Abalos.
Action speaks louder than words. Nabuksan, gipakita na ni Abalos sa publiko ang CCTV footage sa maong P6.7B shabu controversy. Ug bisag unsaon pa ni Azurin pagtakip sa baho nga mialisngaw, dili na niya kini mabawi. Kay nasingo na man kini sa katawhan ug misurop na sa ilang kahiladman.