Sa usa ka semana nako nga pag-estar didto sa Negros Oriental halos nalibot seguro nako ang tanang mga lungsod diin akong nahimamat ang mga tawo.
Sa unang tan-aw mora’g normal ra ang dagan sa ilang kinabuhi ug panginabuhi dili ka makadungog og yawyaw o reklamo ilabi na sa mga suok nga dapit.
Nakaingon ko nga lahi ang ilang batasan nga mora’g wala may marites didtong dapita, focus lang sa ilang mga gimbuhaton.
Hangtud akong nahimamat si Monsenyor Julius Heruela ang Kora Paroko sa Dauin kinsa nisaysay sa mga panghitabo sa ilang lalawigan.
Moabot na sa 30 ka tuig si Heruela isip pari sa lalawigan ug iyang nasaksihan ug nabati ang sentimiento sa mga tawo ug mao usab kini ang tubag sa mga pangutana sa akong huna huna nganong molikay ang mga tawo pangutan-on sa kahimtang nila.
Naputos sila sa kahadlok tungod kay kinabuhi ang nakapusta kuno sa higayon nga dili magustohan sa gitumbok nilang berdugo ang ilang himoon.
Mga pagpamatay nga bisan gani sa pinuy-anan sa mga biktima himoon walay pili ma opisyal man sa baranggay, molupyo ug bisan mga sakop sa media.
Tuntod sa tumang kahadlok magpakahilom nalang ang mga tagtungod nga mao pay mahadlok magsaba saba aron makab-ot ang hustisya.
Matud ni Monsenyor Heruela nga murag gianad nalang sa mga tawo nga mamahimong kabahin sa ilang kinabuhi ang kahadlok ug ang kamatayon.
Aron masalbar sila mas maayong magpakahilom nalang ug dili na mokihol, kong dunay mahitabong krimen mahadlok na gani silang motaho sa mga otoridad tungod sa pagduda nga dapig ba nila kini o dapig sa tawong ilang gikahadlokan.
Dunay mga panghitabo sa Negros nga mismo ang mga.pulis ang mohilot aron dili na mopadayon sa pagpasaka og kaso.
Sa taas nga panahon nataligam-an sa nasudnong kagamhanan nga halos na nawad-an sila og paglaum hangtud namatay si Gov. Roel Degamo nga nahatagan og national attention ang ilang dapit.
Mga senador, kongresusta ug bisan ang presidente ug besi presidente niadto sa lalawigan kinsa nipasalig nga mahatagan og hustisya ang nahitabo.
Matud sa alagad sa Simbahan nga naghinaut ang katawhan nga dili lang kutob sa presensiya sa nasudnong kagamhanan kon dili ang kongkretong aksiyon sa paghatag kanila og mas luwas nga kinabuhi ug panginabuhi aron sa ingon libre na sila sa ilang kahadlok.