Aron pagtabang sa nagpadayong recovery sa ekonomiya sa nasud gikan sa pagkahagba tungod sa pandemya, gidasig ni Presidente Ferdinand "Bongbong" Marcos, Jr. ang publiko nga mobayad sa hustong buhis sa tukmang oras.
Ang pamahayag giluwatan sa presidente atol sa gilusad nga tax campaign sa Bureau of Internal Revenue (BIR) didto sa Philippine International Convention Center sayo ning semanaha.
Giawhag sa presidente ang tanang magbubuhis nga tabangan ang gobyerno.
Sa samang higayon giaghat niya ang mga opisyal ug kawani sa BIR nga paglig-onon pa ang tax system sa nasud aron makabaton og pagsalig ang mga magbubuhis.
Sumala sa presidente kinahanglang magbaton og integridad ang mga kobrador sa buhis aron sa ingon makab-ot ang pagsalig sa katawhan.
Kanindot paminawon sa iyang mga pulong. Mas labi pa gyud unta nga mabulokon ug mahinungdan kun kini iyang personal nga gipuy-an ug gituman.
Kumusta man ang obligasyon sa iyang pamilya ngadto sa BIR? Di nalang ko maghisgot sa kantidad tungod kay di ko sigurado pila nay kinatibuk-ang bayronon sa pamilyang Marcos sa estate tax. Apan usa ka butang ang sigurado, wala pa mabayri sa pamilya sa presidente.
Dili kaha mas maayo nga ang presidente mismo maoy mangulo pagsanong sa iyang kaugalingong panawagan? Sa ingon nga paagi makabaton og pagsalig ang publiko sa tax system sa nasud.
Kun ang presidente mismo maoy mohatag og ehemplo pinaagi sa pagbayad sa dugay nang wala makolekta nga estate tax sa iyang pamilya siguradong molig-on ang pagsalig sa mga magbubuhis sa iyang administrasyon ug sa tax system sa nasud.
Angayan tang hinumduman nga responsibilidad sa kada usa ka Pilipino ang pagbayad og hustong buhis. Ordinaryo ka man nga lumolopyo sa nasud o gamhanang pinili sa katawhan, kitang tanan dunay obligasyon pagbayad og buhis sa gobiyerno.
Ang prinsipyo sa pagbayad og buhis simple. Kini aron dunay magasto ang kagamhanan alang sa batakang serbisyo sa gobiyerno.
Ang responsable nga lumolopyo sa nasud dili na gani kinahanglang pahinumduman sa iyang responsibilidad.
Ug angayang hinumduman sa mga opisyal nga nangatungdanan nga ang magbubuhis dili magmagahi pagbayad sa ilang obligasyon kun makita niini nga gigamit sa husto ang ilang kwarta.
Dili bug-at sa imong buot nga mobayad og buhis kun sigurado ka mga mobalik nimo ang maong kwarta pinaagi sa makabuhong ug makatagbaw nga pag-alagad ug serbisyo.
Bisan sa pagsiguro nalang nga hamis ug way libaong ang kadalanan ug regular nga gikolekta ang basura.