Giulan karon og daghang blessings ang 2nd year nursing student sa University of Cebu nga si Angyl Fayth Ababat tungod sa bayahinong buhat nga iyang gihimo dihang gitabangan niya ang 54-anyos nga si Bernadeta Zamora, ang fruit vendor nga giunay sa paglaslas ang liog sa mismong kapuyo niini.
Nahitabo ang krimen niadtong nakalabayng semana sa downtown area sa dakbayan sa Sugbo diin nakuhaan og cctv ug nakita dili lang ang duha ka panagway sa realidad sa kinabuhi sa tawo ang pagka demonyo sa suspek ug ang pagka anghel dela guardiya sa mga tawong nagpakabana.
Nakadayeg ko mismo aning Angyl Fayth kay bisan og siya ang nangunay sa pag-atiman sa biktima pagpugong sa pag-awas sa dugo, wala niya soloha ang credit kay matud niya nga team effort ang gihimo nila aron maluwas ang kinabuhi sa biktima.
Bitaw nakita man sad sa video nga ni-assist ang kauban niyang mga nursing student nga niadtong higayona naningkamot pud nga maluwas ang kinabuhi sa fruit vendor.
Nahadlok man sila kay wala pa lagi kasinatian sa realidad apan gipatigbabaw gyud nila ang ilang kasingkasing sa pagtabang ug nilampos ang ilang gihimo kay nabuhi man si Bernadeta Zamora human nadala sa tambalanan.
Si Angyl Fayth gihatagan og scholarship sa iyang tunghaan ug naa pa gyuy offer nga libreng review sa higayon nga mo-take na sa board exam human sa ilang graduation.
Wala ug tuo nga pasidungog gikan sa Cebu City Police Office, Cebu City Council, National Youth Commission ug mismo sa University of Cebu ang ilang tunghaan.
Samtang pamilya sa biktima labaw sa tanan ang nagpasalamat og dako sa mga nagluwas sa ilang inahan kay wala na sila magdahum nga mabuhi pa kini.
Giisip nila si Angyl nga tinuod nga anghel sa ilang inahan nga gipadala sa langit aron luwason kini.
Dinhi nato makita nga duna pa gyuy tawo nga tim-os ang kasingkasing sa pagtabang sa uban nga wala magpaabot og bawos, kaninyo mga bayaning anghel angayan nga saludohan.