Matud pa ni Bise Presidente ug DepEd Secretary Sara Duterte, ang kakulang sa mga pasilidad, ang mga gubaon nga tulonghaan ug ang kahinay sa pagpahigayon sa pagbansay sa mga magtutudlo maoy labing dakong suliran nga giatubang sa DepEd karon. Sa tulo ka dagkong suliran nga gihinganlan, ang pagbansay sa mga magtutudlo ang labi’ng angayan nga tutokan. Kay ginaingon man nga “ang matang sa panghunahuna sa magtutudlo maoy labing mahinungdanon sa bisan unsang sistema sa edukasyon.” Ginaingon pa gayud nga “Ang kalidad sa edukasyon dili mahimo’ng molabaw sa kalidad sa iyang mga magtutudlo.” Muleeng!
Kontrabando ang moralidad
Gikompiska sa mga operatiba sa Bureau of Plant Industry ug Bureau of Animal Industry ang pipila ka mga utanon, prutas ug mga processed meat nga dala sa mga pasahero nga miabot sa NAIA Terminal 1. Gidili sa kagamhanan ang pagdala sa mga produktong agrikultura nga walay permit aron malikayan ang dangan nga mahimong makaapektar sa lokal nga pananom. Mao kanay giingon nga basta ginagmay ang ipayuhot, makit-an gayod, apan kon isulod na sa dagkong container ang kontrabando, buta ang mata sa mga operatiba. Tinuod ang panultihon nga “Ang moralidad ma-isip nga kontrabando sa lugar diin ang katawhan nakig-gubat sa kalisdanan”. Madahaan!
Bisan wakwak kaonon
Mipasidaan ang Department of Health sa publiko nga mahimong makadaut sa panglawas ang paggamit sa mga “frozen eggs” isip hulip sa mga preskong itlog tungod sa ka-barato niini, tungod sa posibilidad nga kini kontaminado. Wala ba diay makaamgo ang DOH nga alang sa mga pobre’ng konsumidor, ang pagkaon sa frozen eggs ug ang adlaw-adlaw’ng pagpakigbisog sa padayong pagmahal sa palaliton managsama ra nga makadaut sa lawas ug panghuna-huna? Masayon ang magpakalimpyo apan sa mga kabos ug nagutman natong mga igsoon, bisan gani WakWak, mahimo na’ng kaonon tungod sa kawad-on. Fezteleern!
Ilegal ang pagbaligya
Namahayag ang Sugar Regulatory Administration nga tungod sa spekulasyon nga magkulang na usab ang suplay sa asukal, misaka na usab ang presyo sa asukal. Mahinumduman nga mipasalig ang SRA nga mokunhod ang presyo sa asukal sa bulan sa Enero ning tuiga. Apan kay palpak man ang maong pasalig, mipadayag na usab sila og lain nga rason. Nagmatuod lamang kini sa ka-inutil sa maong ahensya. Ning kinaiya sa SRA nga dili kahudtan og rason, haum ang panultihon nga “Kon produkto pa ang inutil nato nga kagamhanan, mahimo’ng ilegal ang pagbaligya niini”. May’pag moligeed!
“Guest singer” na lang
Matud pa ni Department of Health Officer-in-Charge nga si Maria Rosario Vergeire nga andam siya modawat sa katungdanan kon ugaling tudloon siya nga sunod nga kalihim sa maong ahensya. Kumbinsido si Vergeire nga mabuhat niya ang gimbuhaton ug nga makatabang siya sa nasud. Nag-uros-uros sa kumpiyansa sa kaugalingon ang pamahayag ni OIC Vergeire. Makapahinumdum sa buot mosalmot sa amateur hour singing contest nga sa audition pa lang gani, gibalibaran na sa tigpasiugda kay pwerting yabaga. Apan wala motalaw ang contestant, hinonoa, mi-insister hinoon pag-ingon nga, “Guest singer na lang ko Sir.” Pagkatoytoy!