Tradisyon na sa kadaghanan ang pag-andam og makaon nga saw-an sa pamilya alang sa Noche Buena pagsugat sa Pasko. Bisan simple ang saw-an nga pagkaon ang importante nga magkatigom ang tanang membro sa pamilya ug malipayon.
Apan tungod sa kamahal sa mga palitonon karon daghan ang pamilyang nahingawa paigo pa ba ang ilang budget alang sa noche buena. Ultimo presyo sa lamas diha sa mga merkado misulbong naman hangtud sa P300 ang kilo.
Ang datus nagpakita nga niadtong Nobyembre mitala na sa 8% ang inflation rate dinhi sa nasud. Mao ni hinungdan nganong labihan ka mahal sa palitonon diha sa atong kamerkadohan.
Apan taliwa sa di matuis nga kamatuoran, matud sa usa ka opisyal sa Department of Trade and Industry nga ang usa ka pamilya nga dunay lima ka miyembro paigo na ang P500 alang sa noche buena. Sumala ni Usec. Ruth Castelo nga ang P500 makapalit na og sangkap alang sa spaghetti, fruit salad, hamon, pan, ug queso.
Akong gihagit si Castelo, bisan daginuton ang akong kwarta apan akoy mobayad kun makapalit siya og kumpleto nga sangkap sa spaghetti, fruit salad, ham, pan ug cheese sa kantidad nga iyang gihisgutan. Aw pwede tingali kun mopalit siya og tinakos nga luto nang daan sa karenderya.
Apan unsaon pagkaigo sa maong kantidad nga saw-an sa usa ka pamilya nga dunay lima ka sakop? Ang mga pamahayag nga ingon niini gikan sa mga opisyal sa atong gobyerno nagpakita lang nga wa gyud silay hibangkaagan sa ilang trabaho.
Klarong way hanaw si Castelo sa realidad diha sa kamerkadohan ug timailhan nga natulog siya sa iyang trabaho. Mao nga dili na ta mahibulong kun ang DTI inutil pagbantay sa mga negosyanteng mapahimuslanon.
Tataw nga way klarong monitoring ang nahisgutang ahensiya sa presyo sa mga baligya sa merkado. Kun gihimo pa sa DTI ang iyang mandato dili unta ingon ani ka ignorante ang mga opisyal niini sama ni Castelo.
Dili na ko matingala og sunod pamahayag sa DTI morekumendar ni nga buwad ug ginamos nalay andamon sa kabus nga mga pamilya aron saw-an sa Noche Buena.