Ambot tungod ba sa kakuwang sa katakos, o kakuwang sa paningkamot para sa kaayohan sa kadaghanan, o di lang gyod andam sa ilang puwesto, o gipalabi lang ang politikanhong mga ambisyon, o wa lang gyod magtugkad ang mga tiil sa yuta, pingis ang kasagaran sa mga programa sa administrasyon ni Presidente Ferdinand Marcos Jr.:
• Kamahal sa bugas gitubag og saad sa P20 ang kilo nga bugas humay ug pagpamaligya og P25 kada kilo nga bugas sa Kadiwa Centers nga mas nihit kay sa kaligdong sa bag-ong pamunoan;
* * *
• Kamahal ug kanihit sa asukar gitubag sa P70 kada kilo nga BBM sugar nga gipamaligya sa mga upisina sa Sugar Regulatory Administration (SRA) nga mas pangitaon kay sa sibuyas puti;
• Kapakyas sa 90% sa 10 anyos nga mga estudyante pagsabot sa ilang gibasa gitubag og mandatory toothbrush drill;
• Kakuwang sa mga eskuylahan, classrooms, mga magtutudlo, mga libro ug mga lingkoranan gitubag og confidential ug intelligence funds;
• Kakuwang sa housing para sa labing kabos nga mga pamilya gitubag sa laslas sa budget sa Department of Human Settlements and Urban Development (DHSUD) ug National Housing Authority (NHA);
* * *
• Kakuwang sa pension ug mga benepisyo sa Social Security Sustem (SSS) ug Government Service Insurance System (GSIS) ug kakuwang sa pahuwam sa mga mag-uuma, mga mangingisda ug gagmayng mga negosyante sa Land Bank of the Philippines (LBP) ug Development Bank of the Philippines (DBP) gitubag sa pagtukod og Maharlika Investment Fund (MIF);
• Kapakyas sa bise presidente pagpakita ug pag-atiman sa labing dinaliang panginahanglan sa mga biktima sa katalagman gitubag sa pagtukod og satellite offices ug pagpalit og palasyo isip bag-ong pinuy-anan sa Office of the Vice President (OVP);
* * *
• Mga pagduda makakolekta ba ang Bureau of Internal Revenue (BIR) sa dagkong utang sa buhis sa mga Marcos ug ilang mga alyado gitubag sa pagtaktak sa komisyonado sa BIR nga nisaad sa pagdasig sa presidente nga mahimong role model sa pagbayad sa buhis; ug
• Mga pagduda sa kaligdong sa sistema sa hustisya gitubag pinaagi sa padayong pagpriso ni kanhi Senador Leila de Lima bisan sa pagbakwi na sa mga pasangil batok niya ug pagtago ni kanhi Presidente Rodrigo Duterte gikan sa International Criminal Court (ICC).
* * *