Pasko na gyud mga friends!

December na ug 24 na lang ka adlaw, ato na nga saulogon ang sumad sa birthday ni Jesus Christ.

Komusta kaha ang imong Pasko karong tuiga, malipayon ka ba? Husto ba kaha kon moingon ko nga kining pagsaulog sa Pasko nindot lang kon kwartahan ka?

Kaniadtong Pasko 1982, dunay usa ka tawo, niwang ang panglawas, nagsakay og bisekleta ug mihunong diha sa daplin sa karsada sa dalan Colon.

Magahob kaayo ang downtown area tungod sa mga bata nga nagsige og patingog sa ilang mga torotot, ug daghan sab ang nagpatukar og paskohanong awit.

Gikuot sa lalaki ang iyang nipis kaayong pitaka. Kwarenta pesos ra gyud ang su’d niini. Gisandig sa tawo ang iyang bisekleta sa gutter sa aseras, ug mipalit siya’g pan aron ikatambal sa iyang kagutom.

Mipalit sab siya og softdrinks aron matulon ang gikaon niyang pan. Nakita niya ang daghang tawo nga malipayon kaayo nga nagbitbit sa ilang mga pinalit ug paingon na nga mopauli aron nga adto mag Pasko sa ilang balay.

Ako kadto ang maong tawo mga friends. Dili nako makalimtan ang maong Pasko kaniadto mga friends nga hilabihan nako kapobre. Wa pa ko magtrabaho sa media kaniadto, ug gamay tawon kaayo og sweldo.

Karon, makapalit na ko og mga makaon nga gusto nakong paliton nga makatambal sa akong kagutom. Mao nga dili usa ka pagpanghambog nga usahay, modalit gyud ko og mga pagkaon sa akong mga higala.

Matag Pasko, malipay ko nga bisan og nasakop pa gihapon ko sa pundok sa mga pobre, apan mohatag gyud ko og bisan gamay’ng Pinaskohan sa mga angay’ng hatagan.

Wa na ko maghunahuna nga mohatag og pinaskohan sa mga higala nga arang-arangan og kahimtang. Husto gyud ang giingon nga kon manggihatagon ka, kaloy-an ka ra sab sa Kahitas-an.

Sa wa pa ang pandemic, ug dunay grasya nga miabot kanako, sangko sa langit ang akong kalipay nga usa ka edaran nga lalaking mamunit og basura nga iyang ikabaligya, gihunongan nako didto sa Tupas Street ug gitunolan og kwarta.

Bisan gamay ra kaayo ang akong gihatag, apan mibathay sa panagway sa maong mamasurahay ang kalipay.

Pag-uli sab nako sa dapit nga akong gipuy-an, nasugatan nako ang duha ka tiguwang babaye nga naghangos tawon nga nagtungas sa bungtod.

Gikan kuno tawon sila nga nanaygon, apan gamay ra ang nanghatag kanila. Kada usa kanila, gihatagan nako og kwarta ug nakita nako ang kalipay.

Gisuwat ko kini aron nga kamo nga makabasa niini, palihug, ipaambit ngadto sa nanginahanglan ang grasya nga inyong naangkon kay Ginoo ra ang mobawos kanato.

Maayong Pasko!