Karong nagkaubos og maayo ang palit sa Piso kontra dolyar nabatyagan na ang pagsaka sa mga presyo sa mga batakang papaliton. Ang usa sa hinungdan mao ang nagpadayong gubat didto sa Ukraine nga giatake sa nasud sa Russia.
Apan samtang nagkaanam na og kaanad ang mga Pilipino sa sitwasyon, dili pa gyud panahon para mag-relax o magkumpiyansa ilabi na sa paggastos sa kwarta.
Ang nasinating krisis karon epekto sa gubat didto sa Ukraine ug nabatyagan sa tibuok kalibotan sukad Pebrero ning tuiga sa pagsugod sa pag-atake. Kining maong krisis epekto sa gitawag palang ni Russian President Vladimir Putin og “special military operation” didto sa Ukraine. Mao pa gihapon kini ang tawag ni Putin hangtud niadtong nakalabay nga adlaw nga Miyerkules. Apan karon posibleng mas mograbe pa gyud kini tungod kay nagpatawag na siya og mobilisasyon sa pwersa militar niini ug mibahad sa posibleng pagulbo na gyud sa mas dakong gubat.
Ang gihimo man gud sa Russia sugod palang niadtong Pebrero matawag og boksing nga gigapos ang usa niini ka kamot tungod sa pagtawag lang niya og “special military operation” ang pagsulong didto sa Ukraine.
Tungod niini, wala motuhop og maayo sa hunahuna sa Russian public ang sangputanan kay lagi dili man “giyera” kondili “special military operation” lamang kadto. Politikanhong taktika ug estratehiya niya kini aron dili siya palayason sa pwesto basi lang sa opinyon.
Ang ilang operasyon mikalas na og gibanabang 80 mil ka sundalong Russians ug liboan sab nga Ukrainians, sundalo ug sibilyan ug pagkaguba sa lugar.
Apan karong daghan na ang nakalas sa ilang kasundalohan ug naanam og bawi sa Ukraine ang mga teritoryong gigastohan na nila og kinabuhi, dunay posibilidad nga mosimpatiya kang Putin ang iyang katawhan ilabi na ang mga politikong nisupak.
Kun usbon ug modeklarar siya og gubat sa Ukraine, mausab na unya ang mga patakaran sa ilang pakiggubat. Hasta unya ang gigrabehon sa ilang pagatake ug paagi sa paghimo niini.
Peligro nga tungod niini mapugos na ang North Atlantic Treaty Organization pag-apil ug modako ang giyera nga makaingon sa pagsamot sa nasinati na karong krisis. Layo tinuod ang Pilipinas didto, apan nagsalig kini sa petrolyo ug imported nga mga materyales nga siguradong magnihit pa gyud ug makaapektar sa presyo sa tanang palaliton sa umaabot nga mga adlaw.