Balik na gyud ang kahuot sa traffic sa Metro Cebu ilabi na sa dakbayan sa Sugbo. Niadtong Lunes lang human sa akong newscast sa Balitang Bisdak nagdali ko pagpauli sa dakbayan sa Lapu-Lapu busa nipili ko nga adto moagi sa Cebu Cordova Link Expressway kon CCLEX kay makuha ra man gyud mga 8 minutes kon normal speed ang dagan.
Diha ko miagi sa B.Rodriguez hangtud V. Rama ngadto sa N. Bacalso apan pastilan perti na gyung trapika nga makaulbo sa kaspa, mga usa ka oras nga nag aginod ang dagan sa mga sakyanan.
Nakaginhawa na ko dihang nakaabot na sa Mambaling padulong sa SRP kay luag na, samot sa CCLEX nga perting sutoya ang dagan sa mga dakyanan. Apan wala ko magdahum nga taas ang linya sa mga sakyanan nga naungot sa toll booth.
Sa upat ka toll booth, usa ra niini ang gigahin alang sa cash ang tulo pulos naman alang sa adunay RFIB, nakaingon ko mas maayo nag Mandaue nalang ko kay pareho ra man diay kalakiha ani, niungot ko dili nakabayad pa gyud og 90 pesos.
In fairness sa CCLEX management dugay namay sila nagdasig sa mga vehicle owners nga magpataud na og RFID aron dili na mahasol ug diretso nalang gyud nga mao usay nahitabo niadtong Lunes nga samtang taas kaayo ang linya sa cash lane, hawan kaayo ang mga RFID lane.
Akong sakyanan naa namay RFID apan wala pa man ma-oadi busa agwanta gyud sa paglinya. Apan sa pagkakaron nga aduna pay daghan nga mga wala makapa activate sa RFID mas maayo seguro dugangan bisan usa ka cash lane ang agian sa CCLEX ilabi na sa peak hours.
Dili nako igsapayan kong mobayad og toll fee basta dali ra ang biyahe, pero nakabayad na ka nadelatar pa doble gyud ang kahasol. Hinuon dili gyud mabasol ang CCLEX kay mao man ang ilang patakaran.
Busa ang mga moagi mogamit na gyud sa RFID aron sayon nalang kaayo ang biyahe, kong wala pa aw naay laing tulay nga kaagian duha pa gyud ka buok ug libre pa.
Kong gusto gyud moagi sa CCLEX magpa-RFID na aron dili seguradong mosutoy gyud ang biyahe.