HUNYO 26, 2022: Ikanapulog tulo nga Domingo sulod sa tuig
Mga Pagbasa: 1 Har. 19;16b, 19-21/Sal. 16/Gal. 5;1,13-18/Lk. 9;51-62
Kining maong ebanghelyo karong Dominggoha mao man ang classic nga passage nga magamit labina kun maghisgot kita og vocation stories.
Gani gihimo kining elaborate gyud kaayo sa panahon nga pagahimoon ang mga search ins niadtong buot mamahimong mga pari o mga madre o relihiyoso.
Sa dihang gingnan ni Jesus ang usa ka tawo nga “Pasagdi ang mga patay nga maoy molubong sa ilang mga patay” ang wala man magpasabot nga wala siyay pagpakabana sa mga amahan o ginikanan.
Hinunoa buot ipasabot niini nga mahinungdanon usab ang detachment sa mga higayon nga mosunod kita sa Dios. Kinahanglan nga mopanaw kita nga walay gihambing mga kabalaka ug pagkabilanggo.
Usahay man gud ang mga kabalaka mao man ang hinungdan kun nganong malisud alang kanato ang pagsanong sa tawag sa Dios.
Sa dihang niingon si Jesus: “Ang magpunay og lingi samtang nagdaro dili takus sa gingharian” nagdapit Kanako nga kinahanglan kita mo focus sa dalan nga atong pagasubayon.
Kini ang kahulogan kun maghisgot kita og discipleship.
Sa latod nga pagkasulti ang discipleship usa man ka pakiglambigit tali sa tinawag ug sa nagtawag. Mao nga mo-focus kita sa tawag sa nagtawag kanato alang sa linain nga matang sa pagkinabuhi.
Unta sa hinayhinay kita mogawas sa atong kaugalingong comfort zones ug sa atong giisip nga sense of securities.
Anaa man tuod ang risgo apan sa kaulahian, mas makahuloganon kaayo ang kinabuhi labina kun tugotan lang nato nga hikapon ug buhion sa Espiritu ang tagsa tagsa nato ka mga kasingkasing aron dili nakita maglingi lingi pa.