Nahimong komplikado ang kinabuhi rong mga panahona. Ang kanhiay simple nahimo naman hinuong komplikado ug ang maong komplikasyon maoy nagsilbing maldisyon sa atong kinabuhi. Maldisyon tungod kay nahimo man kining tunglo ug nakapalayo kanato sa tinud-anay nga kalipay. Ingon ini ang kinabuhi ug ang maong kinabuhi nahimong direct and concise.
Nahikalimot kita nga dunay mga mahinungdanong ritwal nga mahimong makapapukaw sa atong kinatibuk-ang pagkatawo lakip na ang atong tagsa tagsa ka mga galamhan.
Ang ritwal nahimong mahinungdanong talan-awon sa kinabuhi nga tawhanon. Bisan gani ang bunyag sa mga kabataan ingon nga usa ka sacramental ritual pahinumdom man nga dunay transition nga nahitabo sa kinabuhi.
Gikan sa kinabuhi nga walay ila kun marka ang Sakramento sa Bunyag nagtudlo man kanato nga diha sa pagka binunyagan kita nahimong markado. Ang marka nga gipatik kanato iya sa Dios ug mao man kini ang nagpahinumdom kanato nga gipanag-iya kita sa Dios.
Sa laing bahin, ang yanong gakus o hawok sa usa ka hinigugma ngadto sa nagkadaiyang bahin sa lawas sa iyang hinigugma nagpasabot nga matag bahin niini mahinungdanon ug angayan lamang tahuron ug hatagan og bili. Ug kay bililhon man angayan lamang nga tipigan ug ampingan. Bisan gani ang yanong prusisyon sa lungon gikan sa simbahan paingon sa sam-ang ritwal man nga nagpahigmata sa tagtungod nga physically dili na sila magkuyog sa namatay. Subo palandungon apan angayang dawaton nga kinahanglang ihatud siya ngadto sa kalibutan sa mga patay.
Mahiligon baya ko sa kahilom apan ang palibot ug mismo ang kaugalingon wala man makatugot niini. Ang aktibong buhat sa pangalagad wala man mopugong apan naghatag Kanako og linain nga perspektibo sa pagsud-ong sa ritwal ingon nga tambal ug pasalig nga anaa ang presensiya’ng Balaan taliwala ning gubot nga kalibutan.
Tungason man tuod ang kalbaryo apan sa inanay nga pagtungas niini anaa ang madasigong pasalig nga wala kita pasagdi sa kahitas-an. Bisan gani ang yanong pagtapion sa akong kamot sa ulo sa akong parokyano ritwal naman nga nagpasabot sa akong tinguha nga sila panalanginan sa kanunay.
Sa dihang giukab ko ang Roman Ritual Vol. II anha ko nakaamgo nga nangandam ko alang sa usa ka solemneng Ritual. Ning tungora ang Ritwal sa Eksorsismo aron mapahawa ang yawa nga maoy dakong babag aron dili makasaulog sa mga sakramentong makaluwas ang biktima.