Kagahapong adlawa moabot sa 67.5 milyones ka mga rehistradong botante sa tibuok Pilipinas ang gitugotan nga makabotar sa nagkadaiyang polling precincts sa nasud alang sa pagpili sa presidente ug bise presidente, 12 ka mga senador, 316 ka mga sakop sa Ubos Balay Balauranan, 81 ka mga gobernador ug bise gobernador , 782 ka mga sakop sa Hunta Provincial, 146 ka mga city mayor ug city vice mayor, 1, 650 ka mga sakop sa konseho sa dakbayan, 1,488 ka mga mayor ug bise mayor sa lungsod ug 11, 908 ka mga municipal councilors.
Sa wala pa ang eleksiyon, nagkalain-lain ang survey nga gipahigayon diin ang kandidato lang nga nag una sa survey ang mituo sa resulta niini samtang ang nangiwit wala motuo niini. Dili sila motuo sa rason tungod kay dili tanan ang gipangutana sa survey.
Kagahapon mao ang aktuwal nga survey diin mikabat sa 67.5 milyones ka mga respondents ang gipangotana kinsa ang ilang pilion nga opisyal. Dinhi klaro na kinsa gayod ang nag una sa mga kandidato. Ang resulta sa eleksiyon mao ang mag validate sa pagka-accurate sa resulta sa mga survey nga politikal.
Apan adunay mga lihok nga makapausab o makaapekto sa resulta sa eleksiyon sama sa vote-buying ug mga pagpanghulga sa mga kandidato ug mga hinanib niini. Hinuon kun dili kaayo grabi ang palit sa boto ug mga pagpangharas dili kaayo kini makaapikto sa resulta sa eleksiyon.
Ang mosunod nga presidente sa Pilipinas sugaton sa P12 trilyones kapin nga utang nga ibilin sa administrasyong Duterte nga kinahanglan niyang bayaran. Ang mga eksperto sa ekonomiya miingon nga gikinahanglan nga ang mosunod nga administrasyon mohimo og sobra sa 6 porsiyento nga pagsaka sa ekonomiya aron makabayad kini sa utang.
Good luck na lang sa mosunod nga presidente sa nasud sa Pilipinas.