Mayo 9. Adlaw nga natawo akong anak (May 9, 1990). Adlaw nga namatay akong amahan (May 9, 1992). Adlaw nga gideklarar ni Tatay Digong nga Special Non-Working Holiday ug adlaw sa nasudnon ug lokal nga piniliay (May 9, 2022).
Kinsa kaha sa nanagkombating karibal nga tandem ang modaog?
“Pagka-so exciting!” Tuaw sa usa ka diehard BBM-SARA supporter ug batan-ong vlogger. Lipay kaayo siya dihang gianunsiyo sa taga Iglesia Ni Cristo nga si BBM ug Inday Sara maoy ilahang suportahan.
Hinuon, wala magpalupig ang grupo sa kaparian ug kamadrehan sa mga Romano Katolikong simbahan, kinsa miladlad sab sa ilang kinakusogang suporta ngadto sa Leni-Kiko tandem. Nga matod pa, nagpanon nga nangampanya.
May mga BBM-SARA supporter medyo nahingawa: Basin kunog si Leni ug Kiko maoy makadaog. Nakalimot ang batan-ong ginang, nga dili tanang pari, kang Leni-Kiko. Adunay ubay-ubayng nagsotana, kinsa sa hilom, mga BBM-SARA supporter diay!
Sa Facebook, dunay BBM-SARA loyalist nga makigpustaanay og P5M. Hatagan pa niyag plus 3M votes nga partida ang motaya sa habig ni Leni ug Kiko. Kini nagpasabot lang, nga salig kaayo ang maong tawo nga si BBM ug Sara maoy modaog.
Pero, may mikomentariyo nga dili mokompiyansa. Kay tanang resulta sa botos moagig COMELEC, diin ang direktor nga si James Jimenez, gisuspenso tungod sa mga nahimo niining kontrobersiya. Kontrobersiya nga nakapahugaw sa integridad sa Comelec.
Tinuoray, pulos bag-o na ang mga commissioner nga giilis ni Tatay Digong, kinsa misaad nga hatagan ang nasod og usa ka limpyo ug honest nga piniliay. Apan angay hinumdoman, nga mayoridad sa mga balota, nahimo na panahon pa sa kanhi nangretirong commissioners ubos sa direktiba ni Jimenez. Diin, nasuta nga kuwestiyonable ang pagkagama.
Samot na, nga bisag biya kaayo pirme sa mga lehitimong pre-voting surveys ang Leni-Kiko tandem sa BBM-SARA Uniteam, mipahayag-bahad ang kampo ni Leni nga guboton kuno nila kon mapilde ilang manok?
Nagpasabot ba kini nga aduna silay sekretong alas nga gisaligan?
Ug kini maoy nakahatag og dakong ka kulba-hinam sa atong pagbotar sulod sa tagsatagsa nato ka presinto niining adlawa.
Diin liwas, human sa iniphanay sa tanang botos, masayran kon ang gipili tang mga kandidato mao bay midaog?
To all voters, good luck!