Ning atong panahon karon daw malisod alang kanato ang pagpili kun unsay tinuod o unsay bakak. Labina karong mga panahona diin nahimong daw idlas ang kamatuoran.
Daghang mga impormasyon nga dili na kasaligan. Nahimong toxic na gyud karon ang palibot mosugot ta o sa dili.
Bisan gani didto sa gawas sa nasud laing matang pud sa kagubot ang ilang nasinati didto labina kun maghisgot kita og Ukraine.
Ang politikanhong linog mismo dinhi sa atong nasud padayong nihulga sa seguridad. Ang mga misinformation padayon kanato nga milumos.
Ang mahudlatong pagbanhig sa mga mapahimuslanon padayon kanatong nihulga hangtud karon. kining tanan gitawag kini og mind condidtioning.
Kasagarang gibiktima niini mao man kadtong mga linghod pa gyud kun maghisgot kita og kasinatian. O dili ba kaha ang mind conditioning tingali gipakapinan og mga incentives tingali load o unsa man gani ang makapadani. Malisod ang panahon mao nga daghan ang mopahimulos.
Dunay nangutana nako kun nganong daghan ra kaayo ang mga bata ug batan-on matag Domingo. Kay dinhi gud sa among parokya akong gipasiugdahan nga matag Domingo magdungan gyud mi og pamahaw. Dunay panihapon usab alang sa laing hugna sa mga batan-on nga manganta sa Katapusang Misa.
Ning paagiha mas nindot ni nga kahigayonan aron masilsil sa alimpatakan sa atong mga kabatan-onan ang bili sa pagtuo ug doktrina sa ilang kinabuhi. Malisod karong panahona kay nahimong subjective ang mga tawo mismo diha sa ilang pagsabot sa moralidad. Apan padayon nako silang gidasig nga kun anaa ang grasya mahinungdanon kaayo nga kini ipaambit kay sa pagpaambit lamang niini kitang tanan mamahimong mabulahan ug magmalipayon sa nga tanan!