Salawayong pangampanya

Dunay hiniusang press conference nga gihimo niadtong Domingo sa pipila ka kandidato pagka presidente ug ang gihisgotan nila mao ang giingong dili makiangayon nga pamaagi sa pagpangampanya sa kampo ni Vice President Leni Robredo.

Mitambong sa presscon ang mga presidentiables nga sila si Manila City Mayor Isko Moreno, Senador Panfilo Lacson, kanhi Defense secretary Norberto Gonzales, ug uban pa nga kandidato pagka presidente.

Wa makatambong si Senador Manny Pacquiao nga kandidato sab sa pagka presidente, apan misuporta usab kini sa nauyonan ubang presidentiables.

Gisaway pag-ayo nila si Robredo ug ang mga sakop niini tungod kay matud pa, tagsatagsa sila nga giawhag nga pasibogon na lang sa pagdagan pagka presidente ug maghiusa sila pagsuporta sa kandidatora ni Leni Robredo.

Ang tumong kuno niini aron nga hingpit nilang mabuntog si Bongbong Marcos nga pagka karon maoy kanunay’ng nanguna sa mga popularity survey.

Gisaway sab ni Lacson ang kampo ni Robredo nga kuno “gipalit” ang pipila niya ka lider sa politika aron nga mobali kini pagsuporta sa ilang grupo.

Atol sa presscon, sila si Lacson ug kaubanan, mibali hinoon pag-awhag ni Robredo nga siya ang mo-withdraw sa iyang kandidatura kon gusto niini nga dili modaug si Marcos.

Ang laing wa mauyoni nilang Lacson mao ang gipakakaw nga pamahayag sa kampo ni Robredo nga kon makadaog man si Bongbong ug mapilde si Leni, dunay gubot nga mahitabo.

Ambot og tinuod ba ang mga tabi-tabi nga ang kandidatura ni Leni Robredo gisuportahan kuno sa mga rebelde, o sa kadagkoan sa Communist Party of the Philippines.

Maayo man si Robredo, apan ang akong gikahadlokan kay kon tinuod nga gisuportahan siya sa mga rebelde, sigurado nga makasulod na unya sa kagamhanan ang mga NPA.

Kang Marcos, ang wa nako magustohi mao ang padayong pagdumili niya pagbayad sa Estate Tax sa katigayonan nga napanunod nila sa namatay nilang amahan, nga ang kantidad miabot na og P203 bilyones.

Unya, gibutyag ni Lacson nga dili diay tinuod nga sa tanang rally sa ubang presidentiables nga gihugopan kini sa katawhan.

Matud ni Lacson nga didto sa Cabanatuan City, naagian nila ang rally ni Robredo nga ilang gibanabana nga gitambongan og mga 2,000 ka tawo.

Apan napasiga ang ilang mga mata kay ang gipagawas niini sa social media gikan sa kampo ni Robredo, pwerteng daghana nga ug miabot kuno’g 35 mil ang nanambong.

Diha na sila nakabantay nga gi-edit ra diay ang ubang hulagway sa mga rally sa ubang kandidato nga nagpatoo nga daghan kaayo nga nanambong sa ilang kalihokan. Pastilan!