Dear Atty. Divine,
Duna koy kapuyo sud na sa upat ka tuig ug aduna mi duha ka anak. Ang akong kapuyo usa ka seaman og plano unta namo nga magpakasal ini’g kanaug niya sa barko karong Mayo. Nangayo nako og requirements alang sa pagpakasal. Apan ang akong amiga mitambag namo nga dili na mi kinahanglan nga mokuha pa og marriage license tungod kay nag live-in na kami ug aduna nay duha ka anak. Tinuod ba attorney nga exempted mi sa pagkuha og marriage license? Daghang salamat. — Luisa
* * *
Dear Luisa,
Ang marriage license usa kini sa labing importante nga rekisitos alang sa valid nga kaminyuon. Apan aduna kini exemption basi sa Article 34 sa atong Family Code nga diin kini nagkanayon nga dili na magkinahanglan og marriage license ang magpakasal kun sila nagpuyo na isip magtiayon sud sa lima ka tuig. Apan kinahanglan nga wa say legal nga babag ang ilang panagtipon. Buot ipasabot nga sa dihang nagpuyo sila way kabilinggan ang usa’g usa kanila. Sa imo nga kaso, upat pa mo ka tuig nga nag live-in busa dili mo mo-qualify sa exemption sa pagkuha og marriage license. Busa kinahanglan gyud gihapon mo nga mokuha og marriage license aron mamahimong valid ang inyong kaminyuon. Thank you and God bless. — Atty. Divine
Alang sa inyong pangutana, palihug lang sa pag-email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.