Hapon sa adlaw’ng Biyernes, Marso 11, 2022, nakadawat ko’g text message nga nagpahibalo: “The distribution of the Senior Financial Assistance in Barangay Guadalupe will be on March 12, 13 and 14, 2022 at the Guadalupe Sports Complex, 7am to 3pm. Thanks!”
Nakalitan ko. Naanad na man god ming seniors nga sugod niadtong pagpanghasi sa COVID-19 hangtod niadtong naghinapos nga mga adlaw sa Disyembre 2021, ang seniors’ financial assistance ihatod man gyod sa among subdibisiyon, diin didto sa gym namo kini kuhaa.
Hinuon, limitado ra sa usa ka adlaw ang pagpanghatag nga sagad itumong sa adlaw’ng Domingo sugod alas 9:00 sa buntag hangtod na pagka-hapon. Dinhay higayon nga pasado alas 9:00 sa buntag ko miadto ug hapit ala 1:00 na sa hapon nakadawat sa nahisgotang ayuda.
Pero, dinhay panahon sama niadtong miaging Disyembre 2021 nga miabot lamang og usa ka oras ang akong paghinuwat ug nakuha ko dayon ang lugar sa akoa. Niining panahona, opisyal nang milingkod si Mayor Mike Rama isip mayor sa siyudad sa Sugbo puli sa mitaliwan nang ex-Mayor Edgardo C. Labella.
Namatikdan namong seniors nga minindot na ang sistemang gipasunod nga makapadali sa transaksiyon. Ug gikalipay kaayo kini.
Apan nausab ang dagan sa panahon. Dihang gipahibalo nga adto na ipakuha sa Guadalupe Sports Complex ang cash assistance ug dili na sa among subdivision gym, kahasol maoy mipasulabi sa akong galamhan. Sa kadaghang seniors sa Guadalupe, dili kaha mi maghuot ug malangay ang paghinatagay?
Hinungdan, nga sa pagka Marso 12, unang adlaw sa cash distribution, didto dayon ko. Pero alas 10:40 na ko sa buntag miabot. Nagtuo gyod kong maabtan kog hapon sa paghinuwat. Apan wala pa gani 15 minutos gikan sa akong pag-abot, nakuha dayon ang akoang pahat.
“Wowww, paspasa sa? Mas nindot pa man diay kini kay sa miaging kapaspas nga akong natilwawan.” Tuaw ko sa hilom.
Unsaon, sa gawas pa lang, may naglaray nang mga lamesa nga mohatag sa imong claimant’s number ug cashier table number. Unya sa entrance pa lang may guide nang mosugat ug mohatod nimo ngadto sa lamesa nga maoy mohatag sa imong ayuda. Haskang dalia ra. Very amazing!
Keep it up, Mayor Mike!