Tubig o reklamasyon

Gipalabang sa konseho sa lungsod sa Pilar sa isla sa Camotes ang Resolution Numero 028-2022 nga nagbalhin sa pundo nga P2,000,000 nga alang unta sa pagpalambo sa reverse osmosis system ngadto na sa reklamasyon nga proyekto.

Ang reverse osmosis usa ka purification process nga nag gamit og permeable membrane aron malain ang ions, wala kinahanglana nga molecules ug dagko nga particles o contaminants gikan sa mainom nga tubig.

Sa hinapos nga termino sa panahon ni kanhi Mayor Dodong “Fracio” Maratas ug Bise Mayor Inday Grace Borinaga niadtong tuig 2016-2019, ang lokal nga kagamhanan sa lungsod sa Pilar naggahin og P2,000,000 alang sa pagpalit og mga tubo ug pagtaod niini aron ikompleto  sa reverse osmosis system nga proyekto.

Kining nahisgotan nga kantidad sakto na nga makakompleto ug makapaagas na sa tubig padulong sa Barangay Lower Poblacion nga lisod abton sa tubig, Upper Poblacion ug Barangay Villahermosa.

Apan niadtong Enero 28, 2022, ang konseho sa lungsod mibalhin sa duha ka milyon nga gahin alang sa nahisgotang proyekto alang sa reklamasyon nga proyekto sa Tulay, Lower Poblacion. Ang Resolution giaprobahan ni Mayor Manuel “Winkey” Santiago.

Dinhi nato makita asa ang inclination sa mga opisyal sa lungsod sa Pilar isla sa Camotes. Dinhi gipakita sa mga opisyal sa nahisgotang lungsod nga mas bililhon nila ang pag abuno sa dagat kay sa ilang katawhan nga gipang-ohaw sa tubig nga mainom.

Unsa man diay ang anaa sa reklamasyon nga proyekto nga mas gipalabi man kini sa mga opisyal sa lungsod kay sa ilang katawhan sa tulo ka barangay nga gipang-uhaw. Unsa man ang anaa sa reklamasyon nga gihikawan man ni Mayor Winkey Santiago ug mga konsehales ang katawhan nga dugay nang nangandoy og tubig mainom? May bulawan ba ang reklamasyon nga proyekto hinungdan nga gibaylo kini sa mga tawo nga gipang-uhaw sa tubig nga mainom? Ang mga opisyal lang sa Pilar ang makatubag sa pangutana.